У Глыбокім гістарычная канферэнцыя збярэ больш за 300 удзельнікаў

Навукова-практычная канферэнцыя "Беларусь, Глыбоцкі край і Эдвард Вайніловіч" пройдзе 25 верасня ў Глыбокім. Навуковы форум збярэ больш за 300 чалавек, паведамілі карэспандэнту БЕЛТА ў райвыканкаме.

У пачатку з прывітальным словам выступяць прадстаўнікі рэлігійных канфесій. Затым удзельнікі прадставяць каля 50 дакладаў на розныя тэмы. Вучоныя, педагогі-краязнаўцы, навучэнцы, спецыялісты краязнаўчага музея раскажуць пра помнікі археалогіі ў Глыбоцкім раёне, гісторыю некаторых вёсак, абмяркуюць ролю роду Корсакаў у развіцці рэгіёна. Удзельнікі закрануць пытанні яўрэйскай гісторыі Глыбокага, дзейнасці каталіцкага ордэна кармелітаў у XVIII-XIX стагоддзях і ордэна францысканцаў у вёсцы Удзела. Таксама выступленні будуць прысвечаны жыццю праваслаўных вернікаў у 1930-я гады ў Віленскім ваяводстве, страчаным святыням у розныя гады і асобе мецэната, палітычнага дзеяча Эдварда Вайніловіча.

Арганізатарамі канферэнцыі выступілі Інстытут гісторыі НАН Беларусі, Міжнародны дзяржаўны экалагічны інстытут імя А.Д.Сахарава БДУ, Глыбоцкі райвыканкам і Рымска-каталіцкая царква ў Беларусі. Мерапрыемства пройдзе па дзяржпраграме навуковых даследаванняў на 2016-2020 гады "Эканоміка і гуманітарнае развіццё беларускага грамадства".