Віцебскі тэатр «Лялька» адправіцца ў гастрольны тур па рэгіёне

Беларускі тэатр "Лялька" адправіцца ў гастрольны тур па Віцебскай вобласці ў маі. Аб гэтым карэспандэнту БЕЛТА паведамілі ва ўстанове культуры.

Калектыў адправіцца на гастролі па паўночным рэгіёне ў маі, дакладныя тэрміны візітаў зацвярджаюцца. "Цяпер вядзецца работа над гастрольным турам. Плануем паказаць спектаклі ў некалькіх раёнах нашай вобласці, - растлумачылі ў тэатры. - У пастаноўках будзе задзейнічана частка тэатральнай трупы, а частка застанецца ў Віцебску для правядзення рэпетыцый".

Артысты віцебскага лялечнага тэатра наведаюць Гарадок, Лёзна, куды прывязуць кранальную гісторыю "Сунічкі для Веліканачкі". З жартоўнай музычнай работай "Піліпка і Ведзьма" паводле вядомай казкі азнаёмяць гледачоў у Полацку і Глыбокім.

Ужо ў красавіку акцёраў "Лялькі" чакаюць на I Міжнародным фестывалі тэатраў лялек "Палярная сава" ў Мурманску (з 19 па 24 красавіка). Расійскаму гледачу беларускі калектыў прадставіць спектакль "Казкі пра казку". Пастаноўка складаецца з урыўкаў розных народных казак, кожны з яе эпізодаў завяршаецца невялікім рэзюмэ з павучальнымі ноткамі.

У час пандэміі каранавіруса тэатру давялося пачакаць з гастролямі. Паездкі сталі аднаўляцца з большай інтэнсіўнасцю ў апошні год: мінулай восенню "Лялька" правяла абменныя гастролі з тэатрам у Пскове, таксама пабывала ў Лепелі. "Для тэатра заўсёды важны абменныя сустрэчы з калегамі і наведванне іншых гарадоў. Заўсёды гэта дае новыя эмоцыі і думкі. Артысты дзеляцца сваёй работай з людзьмі з іншай мясцовасці, і сам працэс абавязкова ўносіць нешта сваё новае: уражанні, натхненне. Такі дыялог з гледачом і калегамі дае чарговыя віткі ў развіцці творчасці", - адзначылі ў тэатры.

Беларускі тэатр "Лялька" ведаюць як у нашай краіне, так і за мяжой. Работы віцебскага калектыву не раз адзначалі Гран-пры, дыпломамі і прызамі на рэспубліканскіх і міжнародных фестывалях.

БелТА