Глыбоцкі раённы выканаўчы камітэт

Адрас райвыканкама:
211800, Віцебская воб., г. Глыбокае, вул. Леніна, 42

Тэлефон прыёмнай:
8 (02156) 2 58 65
Факс: 8 (02156) 2 58 30

Візітная картка горада
Візітная картка горада
Галоўная / Навіны / Навіны вобласці
11 мая 2023

Законапраект па пытаннях прадпрымальніцкай дзейнасці прывядзе да змянення 23 кодэксаў і 450 законаў

Пасылы, адлюстраваныя ў праекце закона "Аб змяненні законаў па пытаннях прадпрымальніцкай дзейнасці", запатрабуюць змяніць 23 кодэксы і 450 законаў. Аб гэтым на сустрэчы з прадпрымальнікамі Віцебскай вобласці паведаміла намеснік дырэктара Дэпартамента па прадпрымальніцтве Міністэрства эканомікі Ірына Бабачонак, перадае карэспандэнт БЕЛТА.

"Пасылы, якія адлюстраваны ў законе, прывядуць да перагляду ўсяго заканадаўства. Нам трэба будзе адкарэкціраваць 23 кодэксы, 450 законаў, роўна столькі ж указаў, а яшчэ пастановы ўрада і ведамасныя дакументы", - сказала яна.

Асноўная мэта падрыхтоўкі законапраекта - трансфармацыя прадпрымальніцкай дзейнасці грамадзян і стварэнне максімальна канкурэнтных умоў для арганізацыі гаспадарчай дзейнасці для ўсіх грамадзян незалежна ад таго, якой арганізацыйна-прававой форме яны аддадуць перавагу, адзначыла Ірына Бабачонак.

Паводле яе слоў, профільнае ведамства і парламентарыі разлічваюць на адкрыты і жывы дыялог з бізнес-супольнасцю, каб прааналізаваць прадстаўленыя нормы, закладзеныя ў аснову дакумента. Усім разам давядзецца паглядзець, дзе маглі застацца тонкія месцы або белыя плямы і што трэба прапісаць больш выразна.

"Акрамя таго, што змяняецца сама канфігурацыя, іерархія прадпрымальніцкай дзейнасці, законапраектам прадугледжваецца сапраўды ўнікальны рэжым трансфармацыі індывідуальнага прадпрымальніка ў статус камерцыйнай арганізацыі. Гэта значыць своеасаблівая рэарганізацыя суб'екта гаспадарання. На сённяшні дзень гэты працэс немагчымы. І калі суб'ект гаспадарання, які першапачаткова прыняў рашэнне пачаць сваю дзейнасць у статусе індывідуальнага прадпрымальніка, з часам набірае абароты і разумее, што для яго ўжо недастаткова трох наёмных работнікаў, то ў яго ёсць адзін шлях - цалкам спыніць сваю дзейнасць у якасці ІП і фактычна пачаць жыць нанова ў статусе юрыдычнай асобы. Пры гэтым мы разумеем, што любая бізнес-ініцыятыва - гэта заўсёды пэўныя напрацоўкі, сувязі, контрагенцкія пагадненні, шмат розных дазволаў, пасведчанняў, сертыфікатаў, адпаведная нерухомая маёмасць і правы на яе. Тут атрымліваецца такі разрыў, які не вельмі зручны для маштабавання суб'ектаў гаспадарання. Наша асноўная мэта - развіццё прыватнага сектара эканомікі і прадастаўленне для яго такой магчымасці", - падкрэсліла Ірына Бабачонак.

Намеснік дырэктара дэпартамента дадала, што сектар малога і сярэдняга бізнесу - адзін са значных сегментаў эканомікі краіны. "Сёння МСП фарміруе практычна трэцюю частку нашай эканомікі, таму дзяржава заўсёды нацэлена на развіццё гэтага сегмента, прадастаўленне максімальна спрыяльных умоў для развіцця прыватнай ініцыятывы, маштабавання прыватнага бізнесу, прадастаўлення магчымасцей па ўзнікненні якіх-небудзь новых тэхналогій. І гэты законапраект - адна з частак такога глабальнага працэсу", - рэзюмавала яна.

Грамадскае абмеркаванне законапраекта ў Беларусі стартавала 2 мая. Дыялогавыя пляцоўкі прайшлі ўжо ў Магілёўскай і Брэсцкай абласцях. Віцебскі рэгіён прымае эстафету трэцім. Сам дакумент рыхтуецца да першага чытання, праект размешчаны на Нацыянальным прававым інтэрнэт-партале.

БелТА