Акцыя «Нашы дзеці». Аляксандр Шубскі наведаў шматдзетную сям'ю Кучынскіх з вёскі Мамаі

Кіраўнік раёна і яго намесніца прывезлі з сабой не толькі святочны настрой, але і прыемныя сюрпрызы і падарункі. Юлія і Пётр былі шчыра рады такой увазе да іх сям'і, а дзеці з захапленнем сустрэлі гасцей, бо яны ведалі, што следам за імі прыйдуць і галоўныя героі свята – Дзед Мароз і Снягурка.

Дзеці з радасцю расказвалі вершы, падрыхтаваныя спецыяльна для гэтай нагоды. За свае старанні дзеці атрымалі ад Дзеда Мароза і Снягуркі падарункавыя наборы цукерак. Сустрэча прайшла ў цёплай і сяброўскай абстаноўцы, напоўненай усмешкамі і смехам.

– Мы вельмі ўдзячныя Аляксандру Мікалаевічу і Таццяне Леанідаўне за тую ўвагу, якую яны надаюць шматдзетным сем'ям, – падзялілася сваімі ўражаннямі Юлія Кучынская. – Такія візіты даюць нам пачуццё ўпэўненасці, што мы не адны, што наша краіна і наша грамадства падтрымліваюць нас.

Аляксандр Шубскі адзначыў важнасць падобных дабрачынных акцый, падкрэсліўшы, што клопат аб дабрабыце сем'яў, асабліва шматдзетных, з'яўляецца прыярытэтам нашай дзяржавы.
– Мы робім усё магчымае, каб кожнае дзіця адчувала сябе шчаслівым і абароненым, – сказаў ён. – Акцыя «Нашы дзеці» дазваляе кожнаму ахвотнаму праявіць клопат і падтрымку тым, каму яна сапраўды неабходна.

Таццяна Тарасевіч падкрэсліла, што ўдзел у такіх акцыях дапамагае стварыць атмасферу адзінства і ўзаемадапамогі сярод жыхароў раёна.