Беларусам у 2025 годзе трэба выплаціць маёмасныя падаткі не пазней за 17 лістапада
31 ліпеня 2025
Беларусам у 2025 годзе трэба заплаціць маёмасныя падаткі не пазней 17 лістапада, паведаміў сёння на прэс-канферэнцыі начальнік галоўнага ўпраўлення падаткаабкладання фізічных асоб Міністэрства па падатках і зборах Андрэй Кавалеўскі.
"Штогод больш за 3,5 млн грамадзян нашай краіны і замежных грамадзян, якія валодаюць у Беларусі нерухомай маёмасцю, аплачваюць маёмасныя падаткі. Гэта зямельны падатак з фізічных асоб, падатак на нерухомасць і транспартны падатак. Плацельшчыкамі з'яўляюцца ўсе грамадзяне, якія валодаюць нерухомасцю, такой як жылыя дамы, кватэры, гаражы, садовыя домікі, лецішчы, камерцыйная нерухомасць, а таксама зямельнымі ўчасткамі і транспартнымі сродкамі, якія стаяць на ўліку ў ДАІ. У бягучым годзе, улічваючы, што штогод ідзе будаўніцтва, прырастае колькасць аб'ектаў нерухомасці, набываюцца транспартныя сродкі, чакаецца, што колькасць такіх плацельшчыкаў перавысіць 3 млн 600 тыс. чалавек", - сказаў Андрэй Кавалеўскі.
На дадзены момант падатковыя органы завяршаюць разлік маёмасных падаткаў. У пачатку жніўня паведамленні будуць перададзены для накіравання па пошце і загружаны ў асабістыя кабінеты плацельшчыкаў. "Многія, хто карыстаўся асабістым кабінетам, звярнулі ўвагу, што летась ім прыходзіла паведамленне яшчэ і на папяровым носьбіце. Таму што былі пытанні, што шэраг грамадзян страцілі пароль да асабістага кабінета, і былі пэўныя нараканні, што папяровага паведамлення няма і не разумеюць, як аплаціць. Сёлета была праведзена пэўная мадэрнізацыя: тыя, хто заходзіў у асабісты кабінет, бачылі ўсплывальнае паведамленне, ці пацвярджаеце вы сваё жаданне атрымліваць паведамленне ў электронным выглядзе. Тыя, хто пацвердзіў сваю згоду, сёлета атрымаюць паведамленне выключна ў электронным выглядзе. На сёння гэта каля 160 тыс. чалавек. Большасць атрымае паведамленні па пошце. Усе паведамленні будуць разасланы плацельшчыкам у тэрмін не пазней 1 кастрычніка. Падаткі падлягаюць выплаце не пазней 15 лістапада, але паколькі ў бягучым годзе гэты дзень прыпадае на суботу, то паводле заканадаўства тэрмін выплаты падатку пераносіцца на першы працоўны дзень. То бок сёлета трэба выплаціць падаткі не пазней 17 лістапада", - звярнуў увагу прадстаўнік МПС.
Маёмасныя падаткі выплачваюцца фізічнымі асобамі па заканчэнні года. "То бок у бягучым годзе мы плацім падаткі за 2024 год. Таму калі нехта ў 2024 годзе валодаў нерухомасцю, транспартнымі сродкамі, нягледзячы на тое, што на сёння кватэра ці аўтамабіль прададзены, падаткі за 2024 год выплачваюцца. Ну і, адпаведна, не плацяць сёлета падаткі тыя, хто набыў маёмасць у 2025 годзе. Падаткі за 2025 год будуць выплачвацца ў 2026 годзе", - растлумачыў начальнік галоўнага ўпраўлення.
Паводле яго слоў, у кожным паведамленні падрабязна прыведзены разлік падаткаў па кожным відзе аб'екта, няхай гэта будзе падатак за кватэру, за зямельны ўчастак ці за транспартны сродак. Таксама паказаны кантактныя тэлефоны падатковых органаў, якія вылічалі падатак, гэта значыць заўсёды можна звязацца, калі ёсць нейкія пытанні. А ў асабістым кабінеце плацельшчыка на сайце падатковых органаў можна азнаёміцца з аб'ектамі нерухомасці, якія абкладаюцца падаткам, ёсць функцыянал, які дазваляе ўнесці карэктыроўкі. І гэтыя праўкі адразу, у анлайн-рэжыме, становяцца вядомыя падатковым органам. Падатковы орган праверыць па дзяржаўных інфармацыйных рэсурсах, ці дакладная інфармацыя, якую ўнёс плацельшчык. Пры наяўнасці падстаў дадзеныя будуць скарэкціраваны, і плацельшчык будзе апавешчаны аб змененым памеры падатку.