Бяспечныя канікулы

22 ліпеня 2021

У межах рэспубліканскай акцыі «Канікулы без дыму і агню» ратавальнікі нагадваюць правілы бяспекі ў перыяд летніх канікулаў.

Лета – гэта адпачынак у дарослых і доўгачаканыя канікулы ў дзяцей. Канікулы – гэта вольны час, сябры, забавы. І калі ж як не летам паганяць на ровары, паплаваць у рацэ, падрапаць каленкі, парваць штаны, залазіць у суседскі сад па яблыкі. А для бабуль-дзядуль, тат-мам час хваляванняў і праблем. Бо самае галоўнае – не дапусціць, каб з любімым дзіцём нешта здарылася. Таму давайце яшчэ раз успомнім пра небяспекі летняга адпачынку ў вёсцы і на дачы і разам паспрабуем пазбегнуць непрыемнасцей.

У вёсцы ў бабулі літаральна у першыя дні канікулаў «гарадскія ўнукі» ўзялі запалкі і за агародам распалілі вогнішча – пасмажыць хлеб. З аднаго боку - хлеў з сенам, з другога - хлеў з дровамі, у некалькіх кроках – пчаліная пасека. Сізы дымок у час убачыў сусед, і ўсёй шчырай кампаніі давялося бегчы з усіх ног па хатах. Атрымаў па заслугах і той, хто прынёс запалкі, і той, хто падпальваў, і староннія назіральнікі.

Адпраўляючы дзяцей у вёску ці на дачу, яшчэ раз нагадайце ім пра небяспеку гульняў з запалкамі, захоўвайце іх у недаступных для дзяцей месцах, не дазваляйце карыстацца газавымі прыборамі, паўтарыце з дзіцем нумары тэлефонаў экстранных службаў.

На суседскай вуліцы поўным ходам ідзе будаўніцтва дома. З раніцы да вечара на ўчастку працуюць будаўнікі. Як толькі яны сыходзяць, падцягваецца дзятва. Лепшага месца для гульняў не знайсці - тут ёсць куды забрацца, праз што пераскочыць, а ўжо як цікава пагуляць у салачкі… Забаранілі гуляць на будоўлі дзецям толькі тады, калі Ванюша падвярнуў нагу, а Даша разбіла каленку.

Дарагія дарослыя, калі вам трэба будзе працяглае будаўніцтва ці рамонт, агарадзіце небяспечныя ўчасткі. Інструменты і матэрыялы прыбірайце ў недаступныя для дзяцей месцы, дастаючы іх па меры неабходнасці. Тлумачце дзецям, што гульні на будоўлі небяспечныя.

Дзятва шумнай грамадой адправілася на возера. Бабуля Ягора паспешыла следам – за сваім прыгледзець,і на суседскіх у выпадку чаго прыкрыкнуць. Нібыта і глыбіня ў возеры – верабейку па калена, ды толькі летась, нацярпеліся ўсе страху, калі адпачывальнік на возера разам з маладымі бацькамі чатырохгадовы малыш бултыхнуўся ў ваду, і ле дзьве не патануў.

І яшчэ адна парада - не адпускайце дзіця купацца адно, заўсёды кантралюйце сітуацыю. Будзьце падвойна пільныя, калі дзіця плавае з надуўным кругам. Не дазваляйце дзіцяці купацца больш за 10 хвілін, ныраць у незнаёмых месцах, балавацца на вадзе.

Вёска – гэта не толькі адпачынак, але і догляд за садам і агародам. Калі вы апрацавалі гародніну хімікатамі, то абавязкова засцеражыце тэрыторыю якім-небудзь агароджай і даходліва патлумачце дзіцяці, што заходзіць туды строга-настрага забаронена, а тым больш зрываць і пра баваць на смак усё тое, што зелянее, жоўкне або чырванее на агародзе. Прыбярыце лекі і хімічныя рэчывы, неабходныя як для саду-агарода, так і для бытавых патрэб, у недаступныя для дзіцяці месцы. Пазабаўцеся пра тое, каб на участку не было атрутных раслін. Калі недалёка знаходзіцца лес, пакажыце і раскажыце дзіцяці якія расліны і ягады нельга чапаць і тым больш іх есці.

Але, нягледзячы на нашы рэкамендацыі і парады, не ператварайце канікулы сваіх дзяцей у адно суцэльнае «нельга». Проста будзьце пільныя і глядзіце ў абодва.

Некалькі дадатковых парад для бацькоў:

- Не падпускайце дзяцей да мангала падчас смажання шашлыкоў. Гэта можа скончыцца сур'ёзнымі апёкамі.

- Усе ёмістасці з вадкасцю, размешчаныя на тэрыторыі дачы або прыватнага падворка павінны быць надзейна зачынены.

- Цяжкія і вострыя інструменты (граблі, лапаты, лесвіца) хавайце далей ад дзіцяці.

- Сачыце, дзе з кім і ў што гуляе ваша дзіця.

- Нагадаеце дзіцяці правілы дарожнага руху і абгаворыце з ім, дзе ён будзе катацца на веласіпедзе.