Глыбокае. Пажарны датчык – надзейны памочнік у доме

У Глыбоцкім раёне работнікі МНС і унітарнага прадпрыемства «Віцебскае прадпрыемства проціпажарных работ» РГА «Беларускае добраахвотнае пажарнае таварыства» працягваюць важную акцыю па ўстаноўцы аўтаномных пажарных апавяшчальнікаў у дамах людзей пажылога ўзросту, тым самым забяспечваюць бяспеку. Гэтая ініцыятыва накіравана на тое, каб зрабіць жыццё пажылых грамадзян больш спакойным.

 

Пажылыя людзі часцей за ўсё жывуць адны, і менавіта для іх асабліва важна мець надзейнага «памочніка», які своечасова папярэдзіць аб небяспецы. Аўтаномны пажарны апавяшчальнік здольны падаць гучны сігнал пры задымленні і падарыць каштоўныя хвіліны для эвакуацыі.

«Устаноўка дэтэктара — гэта не проста тэхнічная мера, а рэальная абарона жыцця. Асабліва актуальна гэта для пажылых людзей, дзяцей і грамадзян з абмежаванымі магчымасцямі», - адзначае інспектар сектара нагляду і прафілактыкі Уладзіслаў Волкаў. 

Падчас візітаў ратавальнікі не толькі ўсталёўваюць абсталяванне, але і праводзяць прафілактычныя гутаркі, правяраюць стан электраправодкі і печанага ацяплення, даюць парады па ліквідацыі выяўленых парушэнняў.

Шырокамаштабная інфармацыйная кампанія сярод насельніцтва аб эфектыўнасці выкарыстання АПІ — прыклад таго, як дзяржаўныя структуры і грамадскія арганізацыі аб’ядноўваюць намаганні дзеля адной мэты: зрабіць жыццё пажылых людзей бяспечней і спакайней.