Калі бяспека спалучаецца з паэзіяй: у Глыбоцкім раёне прайшоў незвычайны конкурс

4 мая 2026

Ён важыць усяго некалькі дзясяткаў грамаў, мацуецца на столі за пару хвілін і гадамі маўкліва ахоўвае дом. Яго задача — заўважыць небяспеку раней, чым чалавек адчуе пах дыму. Яму прысвяцілі свае радкі жыхары Глыбоцкага раёна. Хто ж ён? Герой вялікай справы — аўтаномны пажарны апавяшчальнік. У Глыбоцкім раёне прайшоў незвычайны і вельмі цёплы па атмасферы конкурс. Жыхары раёна стваралі ўласныя вершы, прысвечаныя аўтаномнаму пажарнаму апавяшчальніку. Здавалася б, тэма тэхнічная, але ўдзельнікі конкурсу даказалі: пра бяспеку можна гаварыць ярка, вобразна і па-сапраўднаму натхняльна.

Удзельнікі прадставілі дзясяткі вершаў — ад кароткіх чатырохрадкоўяў да цэлых міні-паэм. У іх аўтаномны пажарны апавяшчальнік ператвараўся то ў «маленькага вартаўніка», то ў «дамавога ратавальніка», то ў «начнога вартаўніка, што не спіць ні хвіліны». Удзельнікі пісалі пра тое, як важна своечасова пачуць сігнал трывогі, чаму апавяшчальнік павінен быць у кожным доме і як ён дапамагае захаваць жыццё. У пяцёрку прызёраў увайшлі мастацкія работы: Галіны Шыман з в. Замошша, Якубёнак Зінаіды з в. Запруддзе, Апяцянок Анастасіі з Глыбокага, Каляго Пятра з аг. Азерцы і Хрол Марыны з в. Матюкава. Здавалася б, тэма строгая, амаль тэхнічная. Кожны верш — гэта не проста рыфмы, а маленькая гісторыя пра тое, як важна пачуць трывожны сігнал своечасова.
Нярэдка мы бачым загалоўкі пра тое, што «АПА выратаваў на пажары…», «На пажары дзякуючы спрацоўцы АПА выратаваны…», «АПА разбудзіў…». Пацвярджэнне таму — рэальныя лічбы і прыклады.
Даведка: у бягучым годзе ўжо выратавана 46 чалавек, 8 — дзеці.
Пажар развіваецца імкліва: усяго некалькі хвілін аддзяляюць невялікае тленне ад адкрытага агню. Асабліва небяспечныя начныя гадзіны, калі людзі спяць і не могуць своечасова адчуць дым. Аўтаномны апавяшчальнік рэагуе на задымленне імгненна і падае гучны гукавы сігнал, які здольны разбудзіць нават моцна спячага чалавека. Ён не патрабуе правадоў, працуе ад батарэйкі і працягвае ахоўваць дом нават пры адключэнні электрычнасці.
Лепшае месца для яго — цэнтр столі, там, дзе паветра рухаецца свабодней за ўсё. І няхай устаноўка здаецца справай сур'ёзнай — насамрэч усё проста. Пара шруб, лёгкі паварот корпуса — і апавяшчальнік ужо на сваім месцы. Пакуль усё спакойна, на яго корпусе мігціць малюсенькі чырвоны агончык — нібы сэрца, што б'ецца ў дзяжурным рытме. Але варта з'явіцца дыму, і ён загаворыць гучна, настойліва, не дазваляючы небяспецы застацца незаўважанай. Яго сігнал — не проста гук, а шанец. Шанец прачнуцца, выйсці, выратаваць сябе і сваіх блізкіх.