«Мы гэтай памяці верныя»: у Віцебску адкрылася выстава ваенна-патрыятычных клубаў, атрадаў і школьных музеяў да 80-годдзя Перамогі
8 мая 2025
Асаблівая роля ў захаванні гістарычнай памяці належыць ваенна-патрыятычным пошукавым атрадам, асноўнай задачай якіх з'яўляецца ўшанаванне памяці загінуўшых салдат. За кожнай рэліквіяй, знойдзенай пошукавікамі на месцах баёў, – лёс і імя чалавека, які ўсе гэтыя гады лічыўся прапаўшым без вестак.
У Музеі гісторыі прыватнага калекцыянавання ў Віцебску прадстаўлена тэматычная экспазіцыя «Мы гэтай памяці верныя». Ініцыятарам стварэння выставачнага праекта выступіла старшыня Савета па ўзаемадзеянні пошукавых атрадаў Віцебскай вобласці «Пошук» Ларыса Бруева. На выставе прадстаўлены матэрыялы з гісторыі пошукавага руху ў Віцебскай вобласці з 1984 года па цяперашні час.
Першыя пошукавыя атрады і клубы сталі з'яўляцца ў Віцебскай вобласці ў 1980-х гадах: «Искатель» ПТВ №96 і «Поиск» ПТВ №19 Віцебска, «Разведчики воинской славы» СШ №2 Наваполацка і «Русичи» ПТВ №110 Оршы.
Першыя ў Беларусі «Вахты Памяці» і пошукавыя экспедыцыі былі праведзены ў Дубровенскім, Віцебскім, Лёзненскім, Шумілінскім, Полацкім раёнах Віцебскай вобласці. А пасля правядзення ў раёне возера Лосвіда першага абласнога пошукавага лагера ўстаноў адукацыі, на базе саветаў школьных музеяў баявой славы пачалі стварацца пошукавыя атрады.
У красавіку 1991 года ў Віцебскай вобласці было каля 30 атрадаў, якія ўваходзілі ў Віцебскае абласное аб'яднанне «Пошук», зарэгістраванае Усесаюзнай асацыяцыяй пошукавых аб'яднанняў «Народная памяць аб загінуўшых абаронцах Айчыны».
Слаўныя традыцыі пошукавага руху на Віцебшчыне ў рамках Беларуска-расійскай праграмы «Неба Радзімы» сёння працягваюць пошукавікі атрадаў «Разведчики Воинской Славы» Наваполацка, «Громовцы» ДУА «СШ №40 Віцебска імя М.М.Громава» і «Авиапоиск» Барысава.