Сардэчна вітаем гасцей і ўдзельнікаў свята “Вішнёвы фестываль”!

Лёгкай паходкай, упрыгожаны колерамі квяцістых лугоў, золатам і блакітам нябеснай вышыні, гронкамі спелых сакавітых ягад да нас прыйшоў ліпень, а з ім – чаканы і любімы ўсімі, дзевяты па ліку, Вішнёвы фестываль!

Мы рады сустрэць вас, паважаныя госці, на глыбоцкай зямлі, такой ураджайнай на працавітых таленавітых людзей і на самабытныя, з мясцовым каларытам, святы.

Прыемна, што дарогі з розных куточкаў зямнога шара, з далёкіх і блізкіх краін, з густанаселеных і невялікіх гарадоў прывялі вас, нашых сяброў і аднадумцаў, да нас – на спеўны, душэўны і непаўторны фестываль.

Мы рады, што ў фестывальным вішнёвым карагодзе шмат нашых даўніх сяброў і, спадзяемся, тых, хто яшчэ стане імі; што госці розных нацыянальнасцяў адчуваюць сябе ў Глыбокім, як дома; што ім хочацца зноў і зноў прыязджаць сюды.

Наша еднасць – у агульным жаданні жыць мірна, спеўна, у дастатку.

Дык няхай жа віруе творчасць, завязваюцца партнёрскія стасункі, мацуюцца адносіны дабразычлівасці і кожны дзень свята будзе эмацыянальным і запамінальным.

Па добрай традыцыі кажам:

Што ж, сябры, ўжо час, напэўна,

Распачаць наш фестываль.

Па глыбоцку дзіўна-спеўна

Закружы вішнёвы баль!

З павагай,

Старшыня Глыбоцкага раённага

выканаўчага камітэта                          А.Н.Шубскі

Старшыня Глыбоцкага раённага

Савета дэпутатаў                               В.М.Цяліца