Прафілактыка правапарушэнняў у сферы сямейна-бытавых адносін

20 чэрвеня 2022

З 18 па 22 чэрвеня 2022 года на тэрыторыі Глыбоцкага раёна праводзіцца спецыяльнае комплекснае мерапрыемства «Быт».

Сямейна-бытавыя адносіны хаваюцца ад старонніх вачэй. Калі пастаянныя скандалы ў сям'і выліваюцца ў трагедыю, то толькі тады яны і становяцца здабыткам галоснасці і заканчваюцца пакараннем. Нярэдка ж сямейным дэбашырам, дзякуючы патуранню пацярпелых членаў сям'і, абыякавасці суседзяў, удаецца ўхіліцца ад адказнасці. Менавіта таму адной з галоўных задач міліцыі ў барацьбе з «бытавой» злачыннасцю з'яўляецца выхаванне актыўнай жыццёвай пазіцыі грамадзян і нецярпімасці да найменшых праяў хатняга гвалту.

Многія ахвяры сямейных дэбашыраў адчуваюць сябе залежнымі ад іх. З-за пастаянных збіццяў і прыніжэнняў яны зламаныя, таму часта зміраюцца са сваім лёсам і церпяць пакуты ўсё жыццё. Гэта адбываецца па розных прычынах: хтосьці баіцца агалоскі, змены сацыяльнага статусу або асуджэння, а хтосьці - нестабільнасці ў жыцці (часцяком менавіта адсутнасць жылля або сродкаў да існавання вымушае ахвяр трываць гвалт на працягу доўгіх гадоў). Менавіта гэтым і карыстаюцца хатнія агрэсары. Для іх страх ахвяры — гэта галоўны рычаг кіравання ёю.

Выяўленне і спыненне бытавых злачынстваў з'яўляюцца адной з формаў прафілактыкі і папярэджання больш цяжкіх злачынстваў супраць жыцця і здароўя грамадзян, асабліва здзейсненых у сферы бытавых адносін. Аднак, праводзіць прафілактыку пры адсутнасці жадання саміх пацярпелых – справа нялёгкая. І шкада, што не многія разумеюць усю важнасць адказнасці за так званыя «невялікія злачынствы». Безнаказанасць прыводзіць да павышэння самаацэнкі крыўдзіцеля і ўсёдазволенасці яго супрацьпраўных дзеянняў, што ў сваю чаргу можа прывесці да непапраўных наступстваў.

Інструментам індывідуальнай прафілактыкі правапарушэнняў, здзейсненых у сферы сямейна-бытавых адносін, у адпаведнасці з Законам Рэспублікі Беларусь «Аб асновах дзейнасці па прафілактыцы правапарушэнняў» з'яўляецца ахоўнае прадпісанне, якое прадугледжвае ўстанаўленне грамадзяніну, які здзейсніў гвалт у сям'і, абмежаванняў на здзяйсненне пэўных дзеянняў. У адпаведнасці

з Законам ахоўнае прадпісанне абавязвае грамадзяніна, які здзейсніў гвалт у сям'і, часова пакінуць агульнае з грамадзянінам, пацярпелым ад гвалту ў сям'і, жылое памяшканне, не мець зносін з ім і забараняе распараджацца агульнай сумеснай уласнасцю на тэрмін ад 3 да 30 сутак. Асобе, якая парушыла патрабаванні ахоўнага прадпісання, пагражае адказнасць у выглядзе штрафу да дзесяці базавых велічынь, або грамадскія работы, або адміністрацыйны арышт.

Сумесна з зацікаўленымі ведамствамі праводзяцца шырокамаштабныя мерапрыемствы, накіраваныя на прафілактыку правапарушэнняў у сферы сямейна-бытавых адносін.

З мэтай аказання дапамогі асобам, якія знаходзяцца ў крызісным стане, супрацоўнікі РАУС пры рэагаванні на паведамленні аб канфліктах у сферы сямейна-бытавых адносін прапануюць ахвярам хатняга гвалту звярнуцца за аказаннем часовага прытулку ў «крызісны пакой».

Ст. інспектар прафілактыкі Глыбоцкага РАУС Кукавенкаў В.Л.