Патрыятычная акцыя “Свечка памяці" прайшла ў парку Перамогі г. Глыбокае

Вера Тэліца, старшыня Глыбоцкага раённага Савета дэпутатаў, звярнулася да ўдзельнікаў патрыятычнай акцыі:

– Мы заўсёды будзем памятаць трагічную дату – 22 чэрвеня 1941 года. Гэта не толькі дзень жалобы. Гэта напамін аб важнасці міру і той цане, якую заплаціў савецкі народ. Вайна пакінула цяжкія шнары на зямлі і ў душах людзей. Мы з удзячнасцю ўспамінаем тых, хто абараняў Айчыну на палях бітваў, самааддана працаваў у тыле. Наш святы абавязак – захаваць памяць аб подзвігу народа. Трэба зрабіць усё, каб жахі вайны не паўтарыліся, а Беларусь развівалася і квітнела.

– Сёння Дзень памяці і смутку аб усіх тых, хто ў гады Вялікай Айчыннай вайны склаў галовы дзеля нас, дзеля таго, каб над намі было мірнае неба. Наша задача, як моладзі, захаваць у сваіх сэрцах гэту памяць, – выступіла перад удзельнікамі акцыі першы сакратар райкама «БРСМ» Яна Раманоўская.

– Сёння дзень памяці аб тых людзях, якія адстаялі нашу Радзіму, мірнае неба. Мы павінны захоўваць гэту памяць дзейсна і малітоўна.

Мы молімся аб тых, хто жыцці свае аддаў за жыцці нашы. Дзякуем Богу за Перамогу, за магчымасць жыць у мірнай і спакойнай краіне, – сказаў настаяцель сабора Раства Прасвятой Багародзіцы г. Глыбокае Сергій Грамыка і правёў малебен аб усіх ахвярах Вялікай Айчыннай вайны.

Удзельнікі патрыятычнай акцыі «Свечка памяці» ўшанавалі памяць загінуўшых у гады Вялікай Айчыннай вайны, запалілі лямпы і ўсклалі кветкі да помніка на брацкай магіле ў парку Перамогі горада Глыбокае.