Прамысловасць, знешнеэканамічны трэк і праверка Узброеных Сілаў. Лукашэнка заслухаў даклады Турчына і Вальфовіча
15 кастрычніка 2025
Прэзідэнт Беларусі Аляксандр Лукашэнка 15 кастрычніка заслухаў падрабязныя даклады прэм'ер-міністра Аляксандра Турчына і дзяржсакратара Савета бяспекі Аляксандра Вальфовіча. Пра гэта БЕЛТА паведамілі ў прэс-службе беларускага лідара.
Даклад прэм'ер-міністра ўключаў актуальныя пытанні ўнутранага парадку дня і ўзаемадзеяння з ключавымі партнёрамі Беларусі на знешнеэканамічным трэку. Таксама дакладзена аб выніках сустрэчы Аляксандра Турчына з міністрам прамысловасці і гандлю Расіі Антонам Аліханавым, якая адбылася ў першай палове дня 15 кастрычніка.
- Беларусь і Расія вызначыліся з умовамі функцыянавання галіны нафтаперапрацоўкі
- Беларусь мае намер дыверсіфікаваць пастаўкі ў Расію за кошт новай прадукцыі прамысловасці
Асобнай і адной з галоўных тэм даклада стала работа прамысловага сектара Беларусі ў цэлым. У прыватнасці, зніжэнне аб'ёмаў вытворчасці (па аб'ектыўных і суб'ектыўных прычынах) і экспарту ў студзені - жніўні бягучага года, пра што сведчаць даныя статыстыкі. Прэзідэнт запатрабаваў ад прэм'ер-міністра сур'ёзна заняцца галіной, звярнуць увагу на гэты напрамак.
Па выніках праведзенага ў панядзелак, 13 кастрычніка, у кіраўніка дзяржавы кадравага дня таксама прадметна абмеркавалі задачы, якія стаяць перад беларускай лёгкай прамысловасцю і канкрэтнымі прадпрыемствамі, на якіх абнавілася кіраўніцтва.
Галоўнай тэмай даклада дзяржсакратара Савета бяспекі Аляксандра Вальфовіча стала раптоўная праверка Узброеных Сілаў Беларусі, якая праводзіцца па рашэнні Прэзідэнта. Размова ішла аб асаблівасцях другога этапу праверкі і першых выніках у цэлым. Таксама закранулі напрамкі, на якія Прэзідэнт і раней патрабаваў звярнуць асаблівую ўвагу: прымяненне беспілотнікаў і сродкаў радыёэлектроннай барацьбы; вопыт спецыяльнай ваеннай аперацыі ва Украіне, які неабходна ўлічваць пры падрыхтоўцы айчынных Узброеных Сілаў.