Прайшла цырымонія ўзнагароджання лаўрэатаў ганаровага звання «Чалавек года Віцебшчыны-2025»

Дэлегацыя Глыбоцкага раёна прыняла ўдзел у урачыстай цырымоніі ўзнагароджання лаўрэатаў ганаровага звання «Чалавек года Віцебшчыны-2025».

У канцэртнай зале «Віцебск» панавала святочная атмасфера. Тут ушаноўвалі найлепшых людзей рэгіёну – лаўрэатаў звання «Чалавек года Віцебшчыны-2025».

У фае разгарнулася сапраўдны кірмаш густу ад найлепшых прадпрыемстваў вобласці, і прадукцыя Глыбоцкага раёна стала яе сапраўдным упрыгожаннем. Нашы гіганты – малочнакансервавы камбінат і мясакамбінат – частавалі гасцей сваімі знакамітымі дэлікатэсамі.

Духмяныя каўбасы, найтанчэйшыя сыры і, вядома, тая самая, любімая з дзяцінства згушчонка – ля дэгустацыйных сталоў нашых прадпрыемстваў быў сапраўдны ажыятаж!

Пачалося ўрачыстае мерапрыемства, прысвечанае ўшанаванню лаўрэатаў ганаровага звання «Чалавек года Віцебшчыны-2025», з прывітальнага слова старшыні Віцебскага аблвыканкама Аляксандра Рагожніка.

Як падкрэсліў старшыня аблвыканкама, чалавек працы ва ўсе часы быў і застаецца галоўным здабыткам дзяржавы, дзякуючы прафесіяналізму і адданасці справе. На Віцебшчыне жывуць і працуюць працавітыя людзі, з велізарным патэнцыялам.

– 2026 год – старт новай пяцігодкі. Зацверджана праграма сацыяльна-эканамічнага развіцця нашай краіны на 2026-2030 гады. Наперадзе ў нас шмат няпростых, але важных задач, якія трэба будзе вырашаць разам. Асаблівую ўвагу трэба надаць прамысловаму комплексу, мадэрнізацыі аграрнага сектара і адраджэнню вёсак, пошуку новых кропак росту ў эканоміцы. Не застанецца па-за ўвагай турыстычны патэнцыял Віцебшчыны, яе прыродная ўнікальнасць і багатая культурная спадчына, – адзначыў кіраўнік вобласці і выказаў упэўненасць, што дзякуючы агульнай мэтанакіраванасці і дысцыпліне мы зможам пераадолець усе цяжкасці і зрабіць паўночны рэгіён камфортным і квітнеючым.

У намінацыі «Жыллёва-камунальная і дарожная гаспадарка, будаўніцтва і архітэктура, паліўна-энергетычны комплекс, сувязь, транспарт і камунікацыі» ганаровага звання «Чалавек года Віцебшчыны-2025» удастоены Аляксандр Іванавіч Сенкевіч, рабочы зялёнага будаўніцтва ўчастка добраўпарадкавання унітарнага прадпрыемства жыллёва-камунальнай гаспадаркі Глыбоцкага раёна.

У намінацыі «Сацыяльная сфера (сацыяльная абарона насельніцтва, культура, адукацыя, навука, спорт, ахова здароўя, моладзь)» ганаровага звання «Чалавек года Віцебшчыны-2025» удастоены галоўны рэдактар раённай газеты «Веснік Глыбоччыны» Андрэй Міхайлавіч Панкрат.

Старшыня Віцебскага аблвыканкама Аляксандр Рагожнік выказаў словы шчырай удзячнасці лаўрэатам за праведзеную працу:

– Жадаю ўсім прысутным і вашым працоўным калектывам моцнага здароўя, дабрабыту і новых поспехаў на карысць Віцебшчыны і краіны!

Старшыня Палаты прадстаўнікоў, упаўнаважаны прадстаўнік Кіраўніка дзяржавы ў Віцебскай вобласці Ігар Сяргейка на цырымоніі ўручэння прэміі:

– Яе заслугоўваюць тыя, хто сваёй энергіяй, розумам і добрым сэрцам вядзе за сабой іншых, задае максімальна высокую планку, стварае і натхняе, на практыцы рэалізуе тэзіс – «Час выбраў нас».

Вас адрознівае прафесіяналізм, адказнасць, выканаўчасць, імкненне да дасканаласці і самае галоўнае – любоў да Радзімы. Перад вобласцю стаяць сур'ёзныя задачы, патрэбны прарыўныя ідэі ў сельскай гаспадарцы, прамысловасці, больш актыўна задзейнічаць бізнес, каб жыццё стала зусім іншым.

Цырымонія ўшанавання лаўрэатаў прайшла ў 17 раз. За гэты час яе ўладальнікамі сталі больш за тысячу дзвесце чалавек.

Для лаўрэатаў і ганаровых гасцей была падрыхтавана канцэртная праграма, якая падарыла новыя нагоды для ўсмешак і яркіх эмоцый.