Супрацоўнікі Глыбоцкага РАУС адзначаюць Дзень міліцыі

Урачыстасць адкрыў начальнік Глыбоцкага РАУС Ігар Дзегцяр. Ігар Васільевіч акцэнтаваў увагу на тым, што супрацоўнікі раённага аддзела міліцыі шануюць традыцыі, закладзеныя калегамі-папярэднікамі, свята захоўваюць памяць аб тых, хто загінуў на пасту, выконваючы службовы абавязак, умацоўваюць сувязь пакаленняў, добрасумленна выконваюць службовыя абавязкі па абароне спакойнага жыцця грамадзян і грамадства.

– У міліцыі працуюць лепшыя: тыя, хто ў свой час выконваў інтэрнацыянальны абавязак у Афганістане, ліквідаваў наступствы катастрофы на Чарнобыльскай АЭС; хто пайшоў па слядах бацькоў і стаў прадаўжальнікам міліцэйскіх дынастый; хто па выніках прафесійнай дзейнасці прызнаны лепшым не толькі ў райаддзеле, але і ў сістэме ўпраўлення ўнутраных спраў Віцебскай вобласці і рэспублікі. Дзякуй за вынікі, годныя гонару, і за нялёгкую, але такую патрэбную грамадству службу, – сказаў Ігар Дзегцяр.

Падчас урачыстасці Ігар Дзегцяр, ваенны камісар Глыбоцкага і Шаркаўшчынскага раёнаў Сяргей Краснадубскі, старшыня ГА «Беларускі саюз афіцэраў» Аляксандр Алехновіч уручылі лепшым супрацоўнікам і ветэранам райаддзела нагрудныя знакі «За выдатную службу», «Выдатнік міліцыі», ганаровыя граматы, граматы і падзякі УУС Віцебскага аблвыканкама, а таксама падзякі Міністра ўнутраных спраў Івана Кубракова.