Удзелаўскі сельсавет прымаў эстафету марафону «Глыбоччына: 85 гадоў гісторыі і дасягненняў»
Яго ганаровымі гасцямі былі старшыня раённага Савета дэпутатаў Вера Тэліца, намеснік старшыні райвыканкама Таццяна Тарасевіч, начальнік аддзела ідэалагічнай работы і па справах моладзі райвыканкама Людміла Карніловіч, загадчык сектара культуры райвыканкама Таццяна Мацюшонак, старшыня Удзелаўскага сельвыканкама Віктар Карман, старэйшына аграгарадка Удзела Юзэфа Будзько, якая прапрацавала ў сферы медыцыны 30 гадоў, былы настаўнік з 42-гадовым стажам Ганна Глембоцкая, якая ператварыла бацькоўскую хату ў міні-музей і захавала для нашчадкаў дух часу нашых дзядоў і бацькоў, уклад беларускага жыцця, сямейную культуру і гісторыю.
Удзельнікамі святочнага мерапрыемства былі таксама прадстаўнікі сельгаспрадпрыемства «За Радзіму», вучні і педагогі Удзелаўскай і Мярэцкаўскай школ, жыхары аграгарадка.
Старшы навуковы супрацоўнік Глыбоцкага гісторыка-этнаграфічнага музея Аляксандр Хайноўскі распавёў пра найбольш важныя і значныя падзеі, якія прайшлі ў раёне за 85 гадоў.
Затым пра сябе, сваю працу, любімую справу – папаўняць фонды сямейнага музея і арганізоўваць сустрэчы былых аднавяскоўцаў – распавяла Ганна Глембоцкая. Ганна Адамаўна выказала словы падзякі райвыканкаму, спецыялістам аддзелаў і службаў, якія прыдумалі такую цікавую ідэю юбілейнага марафону і далі магчымасць вяскоўцам даведацца новае і цікавае, культурна адпачыць і праявіць сябе.
Юзэфа Іванаўна Будзько, хоць і была звязана са сферай медыцыны, у душы аказалася паэтам і напісала цэлую міні-паэму пра жыццё ў аграгарадку Удзела.
Панно з выявай касцёла Беззаганнага зачацця Дзевы Марыі ў аграгарадку Удзела Вера Целіца ўручылі старшыня Удзелаўскага сельвыканкама Віктар Карман разам з майстрам вышыўкі і лоскутнага шыцця народнай студыі майстроў народных мастацкіх рамёстваў «Крыніца» Аленай Згірскай.
Вера Міхайлаўна падзякавала жыхароў аграгарадка за іх працу і творчасць на карысць малой радзімы і пажадала ўсім прысутным здароўя, невычарпальнай энергіі, працавітасці, заслужанай павагі і гонару.
Падарункам для ўсіх удзельнікаў мерапрыемства стаў канцэрт, падрыхтаваны артыстамі Удзелаўскага цэнтра культуры і навучэнцамі Удзелаўскага філіяла Глыбокскай дзіцячай школы мастацтваў.