У Глыбокім прайшоў традыцыйны калядны баль
«Хрыстос нарадзіўся! Бог увасобіўся! Радасцю і ўрачыстасцю напаўняюцца сэрцы праваслаўных вернікаў у гэтыя святочныя студзеньскія дні. Каляды – гэта сямейны свята. А мы з вамі адна вялікая хрысціянская сям'я, якую аб'ядноўвае любоў, надзея і вера. І сёння мы сабраліся ва ўтульнай зале Глыбоцкага гарадскога дома культуры, каб у светлае свята Нараджэння Хрыстовага падзяліцца адзін з адным радасцю і праславіць народжанага Сына Божага», – так вітаў удзельнікаў штогадовага злёту праваслаўнай моладзі Полацкай епархіі благачынны цэркваў Глыбоцкай акругі протаіерэй Міхаіл Ізаітко. Прывітанне айца Міхаіла дапоўніла начальнік аддзела ідэалагічнай работы і па справах моладзі райвыканкама Людміла Карніловіч, пажадаўшы, каб мерапрыемства стала для ўсіх прысутных лепшым калядным падарункам.
На злёт, па даўно складзенай традыцыі, а ў гэтым годзе, – нягледзячы на сапраўдны калядны мароз і снежную буру, якая прайшла напярэдадні, прыехала моладзь з Ушач, Пастаў, Браслава, Докшыц і Мёраў. Прыбылі і пастаянныя ўдзельнікі злёту, даўнія сябры праваслаўнай моладзі Глыбоччыны – выхаванцы Полацкага кадэцкага вучылішча разам з дырэктарам, нашым земляком Станіславам Канстанцінавічам Красоўскім.
Пасля каляднай малітвы на сцэну дома культуры выйшлі юныя артысты. Сёлета выхаванцы нядзельнай школы пры саборы Раства Прасвятой Багародзіцы ў Глыбокім у творчым тандэме з работнікамі дома культуры падрыхтавалі спектакль па матывах казкі Г.Х. Андэрсэна «Снягурачка». Зімовая гісторыя, як вядома, апавядае пра спрадвечную барацьбу дабра са злом. У сэрца і ў вока хлопчыку Каю трапляе асколак д'ябальскага люстэрка, і ён пачынае заўважаць у кожнай рэчы толькі дрэнныя бакі, становіцца грубым і злым, а потым і зусім знікае. Але адважная дзяўчынка Герда адпраўляецца ў царства Снягуркі, у царства вечнага холаду, і сваёй любоўю вызваляе Кая з лядовага палону. Любоў і дабро ўсёпераможныя!
– Цудоўны спектакль! Дзякуй таленавітым акцёрам і ўсім, хто датычны да арганізацыі пастаноўкі. Вы перанеслі нас у дзяцінства, – падзяліўся са сцэны сваімі ўражаннямі кіраўнік аддзела па працы з моладдзю Садружнасці праваслаўнай моладзі Полацкай епархіі протаіерэй Ігар Чачуковіч. – Але, як казаў Аляксандр Сяргеевіч Пушкін, казка хлусня, ды ў ёй намяк. Бо і ў нашы сэрцы, як у сэрца Кая, нямала трапляюць асколачкі. І мы халодна ставімся да блізкіх людзей, некага не заўважаем, свядома ці несвядома крыўдзім. Але гэты холад здольныя растапіць малітва, любоў і дабрыня людзей, якія нас любяць. Памятайце пра гэта. З Раствам!
Працягнулася святочная сустрэча праваслаўнай моладзі ў танцавальнай зале Дома культуры, дзе адбыўся Калядны баль. Адкрылі яго выхаванцы Полацкага кадэцкага вучылішча. У вальсе закружыліся галантныя кавалеры і чароўныя дамы. Вальс, паланез, рускі марш, летка-енька… Нават самыя сарамлівыя і несмелыя, заразіўшыся усеагульным настроем радасці і весялосці, выйшлі на танцавальную пляцоўку і кружылі-кружылі ў танцах. Ах, як цудоўны гэты баль!