У Глыбокім уручылі пашпарты юным грамадзянам у рамках акцыі «Мы – грамадзяне Рэспублікі Беларусь»

Першы дакумент атрымалі 16 школьнікаў з усяго Глыбоцкага раёна, якія дабіліся значных поспехаў у вучобе, творчасці, спорце.

Аляксандр Шубскі, старшыня Глыбоцкага райвыканкама, прыняў удзел у Усебеларускай акцыі «Мы – грамадзяне Беларусі!».

– Сёння вы атрымліваеце не проста дакумент, які сведчыць асобу, а пасведчанне вашага грамадзянскага статусу. Пашпарт – гэта ключ да вашых правоў і абавязкаў перад дзяржавай, – падкрэсліў значнасць моманту старшыня Глыбоцкага райвыканкама Аляксандр Шубскі, размаўляючы з моладдзю.

Дзень Канстытуцыі Беларусі штогод адзначаецца 15 сакавіка як дзяржаўнае свята. Асноўны закон вызначае асновы дзяржаўнай улады і грамадскага жыцця, гарантуе асноўныя правы і свабоды грамадзян, вызначае асновы дэмакратычнай сацыяльнай прававой дзяржавы, а таксама з'яўляецца важным фактарам для фарміравання грамадзянскай ідэнтычнасці і нацыянальнай самабытнасці беларусаў.

Напярэдадні аднаго з галоўных дзяржаўных святаў – Дня Канстытуцыі – у рамках Усебеларускай акцыі «Мы – грамадзяне Беларусі!» пашпарты грамадзяніна Рэспублікі Беларусь лепшым прадстаўнікам моладзі Глыбоччыны, якія маюць асаблівыя заслугі ў вучобе, спорце, грамадскай дзейнасці, уручыла Вера Тэліца, старшыня Глыбоцкага раённага Савета дэпутатаў.

– Для нас, дарослых, гэта магчымасць нагадаць вам пра значэнне грамадзянскай адказнасці, – сказала Вера Тэліца. Яна адзначыла, што атрыманне пашпарта – гэта не толькі фармальнасць, але і пачатак новага этапу ў жыцці кожнага маладога грамадзяніна.