У сувязі з пагаршэннем умоваў надвор'я Дзяржаўтаінспекцыя рэкамендуе кіроўцам загадзя паклапаціцца аб замене летніх шын на зімовыя.

13 лістапада 2024

Зімовыя шыны маюць лепшае счапленне з дарожным пакрыццём ва ўмовах нізкіх тэмператур навакольнага асяроддзя, а таксама забяспечваюць добрую кіравальнасць аўтамабілем і скарачаюць яго тармазны шлях.

Уночы ў Беларусі чакаюцца замаразкі, раніцай — туманы. У такіх умовах, папярэдзілі ў ДАІ, летняя гума «дубее» і перастае забяспечваць належнае счапленне з дарогай. Пры рэзкай змене хуткасці і напрамку руху ўзрастае небяспека заносу. Таму ўжо зараз аўтаўладальнікам рэкамендуецца задумацца аб змене гумы на зімовую.

Правілы дарожнага руху абавязваюць пераходзіць на зімовыя шыны да першага снежня. Пры гэтым вядучыя вытворцы шын рэкамендуюць пераабуваць аўтамабіль у зімовы камплект, як толькі сярэднесутачная тэмпература паветра апускаецца да 7 градусаў па Цэльсіі. Арыентавацца на тэрмометр лепш у ранішнія і вячэрнія гадзіны. На пярэчанне аб тым, што пры сярэднесутачнай тэмпературы 7 °C да абеду ртутны слупок можа падымацца вышэй за дзесяць, адказ у экспертаў адназначны: лепш на зімовых шынах пры 10—12 °C, чым на летніх пры 2—4 °C.

Таксама ў ДАІ напамінаюць кіроўцам аб неабходнасці перабудавацца на больш спакойны і вымераны стыль кіравання. Выбірайце бяспечную хуткасць і дыстанцыю, адмоўцеся ад рэзкіх манеўраў і тармажэнняў, асабліва паблізу пешаходных пераходаў, на прадуваемых участках, мастах, пуцеправодах і закругленнях дарог. Усе людзі, якія знаходзяцца ў аўтамабілі, павінны быць прышпілены, а дзеці да 12 гадоў — перавозіцца ў спецыяльных утрымліваючых прыладах.

Старэйшы інспектар ДПС АДАІ МАБ Глыбоцкага РАУС капітан міліцыі Сівіцкі Е.А.