«Вы самы вялікі народ». Чаму Лукашэнка нацэлены на развіццё адносін з Сірыяй і Ліванам
20 лютага 2025
Блізкі Усход… У гэтым рэгіёне перасякаюцца інтарэсы многіх дзяржаў. І тых, хто паблізу, і тых, хто знаходзіцца далёка і нават за акіянам. А ў сучасным свеце не дай бог трапіць у зону чыіхсьці інтарэсаў - пачнецца такі замес… Тыя ж Сірыя і Ліван. Гэта зусім не бедныя краіны, з багатай гісторыяй і сур'ёзнымі перспектывамі. Так, не без унутраных супярэчнасцей. Але калі нехта хоча атрымаць з гэтага сваю выгаду, чакай вайны. Беларусь, нягледзячы ні на што, якія б падзеі ні адбываліся на Блізкім Усходзе, ніколі не абарвала сувязі з дружалюбнымі дзяржавамі. І больш за тое, заўсёды імкнулася ўнесці свой уклад у іх развіццё. Навошта? Пра гэта мы зараз і пагаворым. У новым выпуску YouTube-праекта БЕЛТА "Па факце: рашэнні Першага" мы раскажам, якую выгаду Беларусь шукае ў Сірыі і Ліване, ды і ў выгадзе ці справа, з якім пасланнем ад Лукашэнкі накіраваўся туды міністр замежных спраў Максім Рыжанкоў і чаму, па словах Прэзідэнта Беларусі, гэтыя дзяржавы заслугоўваюць вялікай будучыні.
Што Беларусь чакае ад Сірыі і Лівана
Беларусь сапраўды мае шмат сяброў на Блізкім Усходзе. Аб'ектыўна хтосьці з іх багацейшы, хтосьці - бяднейшы. Але, як паказала практыка, беларускае кіраўніцтва не мысліць такімі катэгорыямі і не дзеліць краіны на багатыя і не вельмі. Так, з кімсьці мы больш актыўна развіваем інвестыцыйнае супрацоўніцтва, да іншых жа прыходзім са сваімі таварамі і тэхналогіямі. Але з кім бы Аляксандр Лукашэнка ні праводзіў перамовы, ён заўсёды падкрэслівае: закрытых тэм няма.
Такойх жа прынцыпаў Беларусь прытрымлівалася і пры выбудоўванні адносін з Сірыяй і Ліванам. Ніякай палітычнай кан'юнктуры і ўмяшання ва ўнутраныя справы. Толькі раўнапраўны і ўзаемавыгадны дыялог.
- Пасол: у адносінах Беларусі з Сірыяй і Ліванам пачаўся новы этап, і гэта для ўсіх добры шанец
- Беларусь разлічвае аднавіць і пашырыць дыпламатычную прысутнасць у Сірыі і Ліване
"Той патэнцыял, які мы напрацавалі за ўсе гады нашай дыпламатычнай прысутнасці ў рэгіёне Блізкага Усходу і ў адносінах з Сірыяй і Ліванам, дазваляе нам на дадзеным этапе - шмат у чым дастаткова пераломным у жыцці абедзвюх краін - захоўваць свае моцныя, устойлівыя пазіцыі як у двухбаковых адносінах, так і што тычыцца нашай пазіцыі па развіцці сітуацыі ў рэгіёне ў цэлым. Мы тут прысутнічаем выключна з жаданнем раўнапраўнага плённага супрацоўніцтва ва ўсіх абсалютна сферах нашага ўзаемадзеяння, і на двухбаковай аснове, і на міжнароднай арэне", - заявіў Надзвычайны і Паўнамоцны Пасол Беларусі ў Сірыі і па сумяшчальніцтве ў Ліване і Іарданіі Юрый Слука.