Археалагічны музей з'явіцца ў Полацку

У самым старажытным горадзе Беларусі Полацку плануюць стварыць музей археалогіі, паведаміла карэспандэнту БЕЛТА дырэктар Нацыянальнага Полацкага гісторыка-культурнага музея-запаведніка Тамара Джумантаева.

Новы музей размесціцца на Ніжне-Пакроўскай вуліцы ў сценах былога будынка РАУС, які перадалі гісторыка-культурнаму музею-запаведніку. Пабудова з'яўляецца помнікам архітэктуры: у свой час гэта быў жылы корпус францысканскага манастыра. Будынак чакае рэстаўрацыя.

За гады археалагічных даследаванняў Полацка спецыялісты выявілі мноства знаходак. Цяпер у фондзе музея-запаведніка - больш за 20 тыс. прадметаў археалогіі. Гэта ўпрыгажэнні, прадукцыя рамеснікаў, дзіцячыя цацкі, артэфакты з раскопак на тэрыторыі Спаса-Ефрасіннеўскага манастыра, кераміка, старажытная зброя, пячаткі Ефрасінні Полацкай. "Думаю, наша калекцыя будзе папаўняцца. Цяпер плануюцца раскопкі на тэрыторыі Верхняга замка", - адзначыла Тамара Джумантаева.

У будучы музей могуць пераехаць рэстаўрацыйныя майстэрні. Магчыма, працэс аднаўлення артэфактаў будзе адкрытым для наведвальнікаў.

Нацыянальны Полацкі гісторыка-культурны музей-запаведнік пачаў фарміравацца ў 1967 годзе. Сёння ў яго склад уваходзяць больш за 10 музеяў - беларускага кнігадрукавання, баявой славы, музей-бібліятэка Сімяона Полацкага, музей гісторыі архітэктуры Сафійскага сабора і іншыя.