Амаль 25,9 тыс. шматдзетных сем'яў адкрылі дэпазіты па новай праграме «Сямейны капітал»

Для шматдзетных сем'яў на 1 студзеня 2022 года адкрыта 108 375 дэпазітных рахункаў "Сямейны капітал", з якіх па праграме 2020-2024 гадоў - 25 896, паведамілі БЕЛТА ў Міністэрстве працы і сацыяльнай абароны.

Па праграме "Сямейны капітал" 2015-2019 гадоў для шматдзетных сем'яў адкрыта 82 479 дэпазітных рахункаў на $824,8 млн. Памер назначанай у мінулую пяцігодку сумы складаў $10 тыс. для шматдзетных сем'яў, у якіх трэцяе або наступнае дзіця нарадзілася (усыноўлена, удачарона) з 1 студзеня 2015 года да 31 снежня 2019 года ўключна.

Па праграме 2020-2024 гадоў для шматдзетных сем'яў адкрыта 25 896 дэпазітных рахункаў на Br596,6 млн. У новай пяцігодцы сямейны капітал назначаецца шматдзетным сем'ям, у якіх трэцяе або наступнае дзіця нарадзілася (усыноўлена, удачарона) з 1 студзеня 2020 года па 31 снежня 2024 года ўключна. У 2020 годзе памер сямейнага капіталу складаў Br22,5 тыс., у 2021-м - Br23 737,5, а сума пасля індэксацыі на 2022 год будзе апублікавана ў бліжэйшы час. У ведамстве нагадалі, што ў адпаведнасці з прэзідэнцкім указам з 1 студзеня гэтага года зменены парадак і пашыраны напрамкі датэрміновага распараджэння сямейным капіталам.

"На 1 студзеня бягучага года на датэрміновае распараджэнне сродкамі сямейнага капіталу пададзена 48 981 заява. У тым ліку на паляпшэнне жыллёвых умоў - 42 622 (87 працэнтаў), на атрыманне адукацыі - 2897 (6 працэнтаў), на атрыманне медыцынскіх паслуг - 3462 (7 працэнтаў). Прынята 46 898 рашэнняў аб датэрміновым распараджэнні сродкамі сямейнага капіталу", - адзначылі ў Мінпрацы.

Больш за ўсё рашэнняў аб размарозцы сямейнага капіталу прынята ў Брэсцкай вобласці - 9973, следам ідуць Мінская - 7921, Гомельская вобласць - 7617, Мінск - 6612, Гродзенская вобласць - 5345, Магілёўская - 4783. Менш за ўсё такіх рашэнняў прынята ў Віцебскай вобласці - 4647.

БелТА