Беларусь і Дагестан маюць намер супрацоўнічаць у сферы імпартазамяшчэння

Беларусь і Дагестан маюць намер супрацоўнічаць у сферы імпартазамяшчэння. Аб гэтым журналістам расказаў старшыня Дзяржаўнага камітэта па маёмасці Дзмітрый Матусевіч па выніках сустрэчы з кіраўніком Дагестана Сяргеем Мелікавым у Махачкале, паведамілі карэспандэнту БЕЛТА ў прэс-службе Дзяржкаммаёмасці.

Супрацоўніцтва Беларусі і Дагестана развіваецца дынамічна. "Ужо ў бягучым годзе рост тавараабароту складае не менш як 30 працэнтаў. Разам з тым, у сувязі з пэўнымі падзеямі, імпартазамяшчэнне застаецца актуальным напрамкам дзейнасці не толькі для расійскага боку, але і для беларускага", - расказаў ён.

Кіраўнік Дзяржкаммаёмасці адзначыў, што ў тавараабароце дзвюх краін пераважаюць не толькі прадукты харчавання, але і тавары для будаўніцтва, напрыклад шкло. "Мы пагаварылі з кіраўніцтвам рэгіёна і плануем развівацца ў гэтым напрамку. У ідэале мы павінны на пастаяннай аснове абменьвацца ўсімі патрэбнасцямі, якія ў нас узнікаюць, напрыклад, па запчастках або значных стратэгічных напрамках", - сказаў Дзмітрый Матусевіч.

На думку старшыні, цяпер настаў час для будаўніцтва вытворчасцей спецыялізаванай сельгастэхнікі ў Дагестане, а таксама нарошчвання магутнасцей для рамонту і абслугоўвання беларускай тэхнікі. "З улікам таго, як дынамічна ў Дагестане развіваецца турызм і інфраструктура, беларускія будаўнікі, мостабудаўнікі і дарожнікі маглі б дапамагчы расійскаму рэгіёну ў гэтым напрамку", - лічыць Дзмітрый Матусевіч.

Таксама Сяргей Мелікаў у сваім Telegram-канале падкрэсліў, што прыярытэтным напрамкам супрацоўніцтва для Дагестана з'яўляецца ўстанаўленне ўстойлівых кааперацыйных сувязей з флагманам беларускага машынабудаўнічага комплексу - Мінскім трактарным заводам. "Мы прапрацоўваем магчымыя закупкі для патрэб прамысловых вытворчасцей", - гаворыцца ў паведамленні.

Сустрэча Дзмітрыя Матусевіча з Сяргеем Мелікавым прайшла ў рамках сумеснага пасяджэння калегій Дзяржаўнага камітэта па маёмасці і Федэральнай службы дзяржаўнай рэгістрацыі, кадастра і картаграфіі Расіі (Расрэестр).

БелТА