Беларусь і Тульская вобласць зацікаўлены ў развіцці супрацоўніцтва

Беларусь і Тульская вобласць (Расія) зацікаўлены ў развіцці супрацоўніцтва. Аб гэтым карэспандэнту БЕЛТА паведамілі ў прэс-службе канцэрна "Беллегпрам" па выніках рабочай нарады ў рэжыме відэаканферэнцсувязі з урадам Тульскай вобласці.

Першы намеснік губернатара Тульскай вобласці Вячаслаў Федарышчаў адзначыў, што ўрад рэгіёна лічыць Беларусь надзейным стратэгічным партнёрам, з якім выбудавана супрацоўніцтва па ўсіх напрамках эканамічнага развіцця і бачыцца вялікі патэнцыял для пашырэння ўзаемадзеяння. "Мы паспяхова супрацоўнічаем у сельскай гаспадарцы, спорце, культуры, прадпрымальніцтве, адукацыі і прамысловасці. Гэта асабліва важна на фоне пашырэння інтэграцыйных працэсаў у рамках Саюзнай дзяржавы і Еўразійскага эканамічнага саюза", - сказаў віцэ-губернатар.

Удзельнікі нарады адзначылі, што ўмацоўваецца і сацыяльна-культурнае партнёрства. Рэгулярна праходзяць абменныя гастролі тэатраў, міжнародныя адукацыйныя мерапрыемствы, спаборніцтвы і сумесныя трэніроўкі спартсменаў.

Бакі дамовіліся прадоўжыць рабочыя кантакты па лініі профільных ведамстваў у сферах прамысловасці, сельскай і дарожнай гаспадаркі, турызму, адукацыі, спорту і культуры.

Кіраўнік "Беллегпрама" Таццяна Лугіна падкрэсліла, што беларускі бок зацікаўлены ў дынамічным развіцці эканамічных сувязей з Тульскай вобласцю і выказала ўпэўненасць, што сумесныя намаганні партнёраў дадуць магчымасць знайсці новыя вектары ў двухбаковым супрацоўніцтве.

У 2019 годзе тавараабарот паміж Тульскай вобласцю і Беларуссю склаў больш за $268 млн. Беларускія прадпрыемствы ў 2019 годзе паставілі ў расійскі рэгіён на 14,1 працэнта больш тавараў, чым год таму. У асноўным гэта прадукцыя тэкстыльнай і хімічнай прамысловасці, машынабудавання, а таксама харчовыя тавары. Ключавыя пазіцыі паставак тульскіх прадпрыемстваў у Беларусь сканцэнтраваны ў галінах чорнай металургіі і арганічнай хіміі.

З беларускага боку ў відэаканферэнцыі прынялі ўдзел старшыня "Беллегпрама" Таццяна Лугіна, намеснік міністра прамысловасці Дзмітрый Харытончык і намеснік міністра сельскай гаспадаркі і харчавання Ала Ламакіна.