Беларусь у 2022 годзе экспартавала кандытарскай прадукцыі на $165 млн

Экспарт кандытарскай прадукцыі за 2022 год склаў $165 млн. Аб гэтым на II Міжнародным сімпозіуме кандытараў Food prom confectionary 2023 паведаміў журналістам намеснік прэм'ер-міністра Леанід Заяц, перадае карэспандэнт БЕЛТА.

"Кандытарская галіна - флагман харчовай прамысловасці Беларусі, дзе сканцэнтраваны вялікія рэсурсы. За 2022 год нашы фабрыкі прадэманстравалі дадатныя вынікі. Так, прыкладна трэць валютных паступленняў у краіну забяспечвае кандытарская галіна. У мінулым годзе такой прадукцыі было экспартавана на $165 млн. Пры гэтым па выніках работы за тры месяцы бягучага года таксама назіраецца дадатная дынаміка", - сказаў Леанід Заяц.

Паводле яго слоў, ёмістасць рынку кандытарскай галіны краіны ацэньваецца 200 тыс. т прадукцыі. Цяпер фабрыкі Беларусі вырабляюць каля 155 тыс. т, адпаведна ёсць зачын для павелічэння аб'ёмаў.

"Прадпрыемствы кандытарскай галіны, безумоўна, павінны нарошчваць аб'ёмы вытворчасці. Важна забяспечваць імпартазамяшчэнне і пастаўляць гатовую прадукцыю на экспарт. Адзначу, што цяпер унутраны рынак краіны забяспечаны айчыннай кандытарскай прадукцыяй пад поўную патрэбнасць насельніцтва", - запэўніў віцэ-прэм'ер.

Міжнародны сімпозіум кандытараў праходзіць у Мінску 24-25 мая. Мерапрыемства аб'яднала кіраўнікоў, спецыялістаў кандытарскай і сумежных галін з Беларусі і краін замежжа. На сімпозіуме будуць праходзіць дыскусіі, круглыя сталы і нефармальныя сустрэчы. Мерапрыемства ставіць перад сабой задачы па вырашэнні пытанняў інтэграцыі, практычнага ўзаемадзеяння, абмену вопытам, перспектыў развіцця кандытарскай галіны, азнаямлення з інавацыямі галіны і дасягненнямі ў галіне тэхналогій і абсталявання, наладжвання прамых кантактаў з вытворцамі, рэтэйлам і пастаўшчыкамі, папулярызацыі айчынных тавараў і пошуку шляхоў павышэння экспартнага патэнцыялу.

БелТА