Беларусь зацікаўлена ў пашырэнні кааперацыйных сувязей з Омскай вобласцю

Беларусь зацікаўлена ў пашырэнні кааперацыйных сувязей з Омскай вобласцю Расіі, паведаміў прэм'ер-міністр Беларусі Раман Галоўчанка на сустрэчы з губернатарам Омскай вобласці Аляксандрам Бурковым, перадае карэспандэнт БЕЛТА.

Паводле слоў прэм'ер-міністра, бакі могуць развіваць супрацоўніцтва ў сферы машынабудавання. "Тут абавязкова трэба прыбаўляць, тым больш што ўжо ёсць добры вопыт не толькі тавараабменных аперацый, але і больш развітых форм, такіх як інвесціраванне ў сумесную вытворчасць. У нас ёсць прыклады, калі на тэрыторыі Омскай вобласці ажыццяўляецца вытворчасць або пэўныя тэхналагічныя перадзелы беларускай прадукцыі, такія як зборка агрэгатаў для камбайнаў з беларускіх камплектуючых. У Беларусі "Омсктэхвуглярод" рэалізуе інвестпраект па стварэнні інавацыйнай вытворчасці розных марак тэхнічнага вугляроду, які з'яўляецца асноўнай сыравінай для вырабу аўташын", - сказаў Раман Галоўчанка.

"Гомсельмаш", "Амкадор", "Бабруйскаграмаш" таксама зацікаўлены ў пашырэнні кааперацыйных праграм. Раман Галоўчанка выказаў зацікаўленасць беларускага боку пастаўляць у Омскую вобласць сельгастэхніку. "Мы можам закрыць практычна ўсе патрэбнасці Омскай вобласці ў грузавой, дарожна-будаўнічай, камунальнай тэхніцы, машынах і абсталяванні. Мы развіваем нашы машынабудаўнічыя магутнасці, арыентуючыся на патрабаванні расійскага рынку", - адзначыў ён. Магчымы пастаўкі гарадскога транспарту - ад аўтобусаў да скорасных электрапаяздоў "Штадлер-Мінск".

Ён таксама прапанаваў развіваць супрацоўніцтва ў аграрнай сферы, умацаванні харчовай бяспекі, уключаючы пастаўку гатовых прадуктаў харчавання, у стварэнні малочнатаварных комплексаў, птушкаферм, уладкаванні сельскіх населеных пунктаў з удзелам беларускіх спецыялістаў. Беларускі бок гатовы актывізаваць супрацоўніцтва ў будаўнічай сферы, уключаючы будаўніцтва і праектаванне жылля, інфраструктурных, сацыяльных і спартыўных аб'ектаў.

У Беларусі з Омскам даўнія і трывалыя сувязі, яшчэ з 1998 года дзейнічае адпаведнае пагадненне паміж урадам Рэспублікі Беларусь і адміністрацыяй Омскай вобласці. "У 2018 годзе ў нас быў максімальны паказчык тавараабароту ў памеры $105 млн, у 2019-м ён знізіўся да $90 млн. У бягучым годзе разлічвалі пераадолець гэты невялікі спад, але крызісныя з'явы ў сусветнай эканоміцы (з-за пандэміі. - Заўвага БЕЛТА) прывялі да зніжэння тавараабароту, які за сем месяцаў склаў усяго $35 млн", - сказаў прэм'ер-міністр.

Кіраўнік беларускага ўрада лічыць, што гэтаму ёсць аб'ектыўныя прычыны, але ёсць і рэзервы, якія бакі не змаглі выкарыстаць. "Думаю, праграма мінімум - гэта выйсці на вынікі 2019 года, а яшчэ лепш - прыбавіць. Часу дастаткова, эканоміка, сувязі аднаўляюцца", - дадаў ён.

Аляксандр Буркоў у сваю чаргу прапанаваў падрыхтаваць хаця б трохгадовую праграму супрацоўніцтва Беларусі і Омскай вобласці і скласці план узаемадзеяння ў розных галінах. На яго думку, дакумент можна было б падпісаць у бягучым годзе ў час візіту беларускай дэлегацыі ў Омскую вобласць. Сярод кропак росту ў будучай праграме ён назваў традыцыйнае супрацоўніцтва ў прамысловасці і сельскай гаспадарцы. Губернатар заўважыў, што ў Омскай вобласці ўжо стымулююць продаж сельгастэхнікі беларускай вытворчасці.

Што датычыцца вытворчай кааперацыі, у Омскай вобласці арганізавана зборка жняярак "Палессе", і Аляксандр Буркоў прапанаваў абмеркаваць пытанне лакалізацыі гэтай вытворчасці. "У гэтых умовах мы гарантуем павелічэнне аб'ёмаў вытворчасці і продажаў на тэрыторыі Омскай вобласці, больш таго, для "Палесся" мы будзем яшчэ адным акном выхаду ў Казахстан, дзе таксама вялікі попыт на сельгастэхніку", - растлумачыў ён.