Больш за 160 прадпрыемстваў Беларусі і Казахстана ўдзельнічаюць у рабоце дзелавога савета

Прадстаўнікі больш як 160 прадпрыемстваў Беларусі і Казахстана прымаюць удзел у анлайн-пасяджэнні дзелавога савета. Аб гэтым паведаміў старшыня Беларускай гандлёва-прамысловай палаты Уладзімір Улаховіч, перадае карэспандэнт БЕЛТА.

"Сёння больш за 60 прадпрыемстваў з Казахстана і 103 беларускія кампаніі зарэгістраваліся для ўдзелу ў пасяджэнні нашага дзелавога савета. На жаль, цяпер гэта віртуальная пляцоўка для перагавораў, паколькі абмежавальныя меры з-за пандэміі яшчэ не паслабляюцца. Яны скоўваюць наша ўзаемадзеянне ў традыцыйных формах, але тым не менш дзелавы савет - гэта наша спецыяльная форма ўзаемадзеяння, калі прадпрыемствы працуюць непасрэдна пры падтрымцы палат, нашых дыпмісій, галіновых міністэрстваў, каб не толькі пацвердзіць намеры, а ператварыць іх у новыя дзелавыя і камерцыйныя праекты," - адзначыў кіраўнік БелГПП.

Гаворачы аб двухбаковых адносінах Беларусі і Казахстана, Уладзімір Улаховіч падкрэсліў, што эканомікі дзвюх краін выгадна дапаўняюць адна адну. "Нашу ўзаемадапаўняльнасць адлюстроўвае і наменклатура гандлёвага ўзаемадзеяння. Прадукцыя беларускага машынабудавання на працягу многіх гадоў мае ўстойлівы попыт на рынку Казахстана, а тыя сем зборачных вытворчасцей, што там працуюць, якраз з'яўляюцца інфраструктурай, якая дасць магчымасць і далей развіваць прамысловую кааперацыю. Беларускія прадукты таксама карыстаюцца поспехам", - расказаў ён.

Старшыня палаты выказаў меркаванне, што неабходна асвойваць новыя нішы для ўмацавання супрацоўніцтва дзвюх краін. "Гэта перш за ўсё звязана са стварэннем сумесных вытворчасцей па выпуску прадукцыі з высокай дабаўленай вартасцю на аснове інавацыйных тэхналогій", - падкрэсліў Уладзімір Улаховіч