Пастаўкі рапсавага алею на ўнутраны рынак Беларусі ў I паўгоддзі ўзраслі амаль у 19,5 раза

Прадпрыемствы "Белдзяржхарчпрама" паставілі ў I паўгоддзі на ўнутраны рынак рапсавага алею ў 19,5 раза больш у параўнанні з аналагічным перыядам мінулага года, паведамілі карэспандэнту БЕЛТА ў прэс-службе канцэрна "Белдзяржхарчпрам".

"Перапрацоўка рапсу - актуальны для Беларусі напрамак. Гэта харчовая бяспека краіны і работа ў сегменце імпартазамяшчэння, - адзначыў старшыня "Белдзяржхарчпрама" Анатоль Бубен. - За апошні год попыт на рапсавы алей вырас ў 19,5 раза. Калі за студзень - чэрвень 2020 года прадпрыемствамі канцэрна было пастаўлена на ўнутраны рынак каля 78,8 т, то ўжо ў першым паўгоддзі 2021 года - 1 533,8 т".

Як адзначылі ў прэс-службе, Віцебскі алейнаэкстракцыйны завод выпускае раслінны алей для харчовых і тэхнічных мэт па прагрэсіўным метадзе перапрацоўкі "фарпрасаванне - экстракцыя", а таксама шрот (бялковая сыравіна для вытворчасці камбікармоў). Выхад рапсавага алею - да 43 працэнтаў. Вытворчая магутнасць прадпрыемства - да 130 тыс. т алейнага семя за год.

"У планах завода - павялічыць перапрацоўку на 100 т насення рапсу за суткі за кошт замены тостара ў алейнаэкстракцыйным цэху і выйсці на 500 т. Таксама будзе абноўлена абсталяванне ў падрыхтоўча-прэсавым аддзяленні. Гэта пазітыўна паўплывае на якасць прадукцыі і дасць магчымасць наладзіць поўны цыкл вытворчасці рапсавага алею - ад перапрацоўкі да прылаўка", - расказалі ў канцэрне.

Да канца 2025 года Віцебскі АЭЗ плануе наладзіць разліў рапсавага алею на сваёй вытворчай пляцоўцы. Ужо распрацаваны дэталёвы план мадэрнізацыі, у выніку якой будзе наладжаная работа ўласнай лініі рафініравання, а ў продажы з'явіцца віцебскі рапсавы алей.

Як паведамлялася раней, канцэрн "Белдзяржхарчпрам" запусціў сацыяльны праект "Рапсавы алей на стале - здароўе ўсёй сям'і!". Мэта праекта - азнаёміць беларусаў з высакаякасным здаровым прадуктам айчынных прадпрыемстваў. Білборды, якія нагадваюць пра карысць рапсавага алею беларускіх брэндаў, з'явіліся ў Мінску, далей яны з'явяцца па ўсёй краіне. Наступным этапам стане запуск анімацыйнага відэароліка і аўдыяроліка на вядучых тэле- і радыёстанцыях рэспублікі. Акрамя таго, да канца лета ва ўстановах аховы здароўя будуць даступны інфармацыйныя бюлетэні аб карысных уласцівасцях рапсавага алею для забеспячэння максімальнага інфармавання насельніцтва.

БелТА