План падрыхтоўкі законапраектаў на 2019 год зацверджаны ў Беларусі

Урад зацвердзіў план падрыхтоўкі законапраектаў рэспубліканскімі органамі дзяржкіравання на 2019 год, паведамляе БЕЛТА са спасылкай на Нацыянальны прававы інтэрнэт-партал.

Адпаведная пастанова Савета Міністраў нумар 77 прынята 4 лютага 2019 года.

У план увайшлі 33 законапраекты ў розных сферах. У прыватнасці, дакумент прадугледжвае падрыхтоўку законапраектаў аб унясенні змяненняў і дапаўненняў у грамадзянскі, банкаўскі, крымінальны кодэксы і Кодэкс аб нетрах, а таксама ў закон "Аб змяненні кодэксаў па пытаннях медыяцыі". Як адзначаецца, удасканаленне норм кодэксаў будзе ажыццяўляцца з улікам практыкі іх прымянення.

Будуць падрыхтаваны законапраекты аб унясенні з улікам практыкі прымянення законаў змяненняў і дапаўненняў у законы "Аб аказанні псіхіятрычнай дапамогі", "Аб лекавых сродках", "Аб ахове здароўя", "Аб трацейскіх судах", "Аб сумесным домаўладанні", "Аб грамадзянстве Рэспублікі Беларусь", "Аб турызме", "Аб барацьбе з карупцыяй".

Пастанова вызначае таксама падрыхтоўку законапраектаў "Аб персанальных даных", "Аб правах інвалідаў і іх сацыяльнай інтэграцыі", "Аб самарэгулюемых арганізацыях", "Аб судова-экспертнай дзейнасці", "Аб ахове і выкарыстанні тарфянікаў", "Аб дзяржаўнай рэгістрацыі і ліквідацыі (спыненні дзейнасці) суб'ектаў гаспадарання".

У план уключана падрыхтоўка канцэпцыі законапраекта "Аб страхавой дзейнасці".

Рэспубліканскім органам дзяржаўнага кіравання даручана забяспечыць своечасовую і якасную падрыхтоўку законапраектаў (іх канцэпцый), прадугледжаных планам, іх узгадненне з зацікаўленымі і прадстаўленне ва ўрад ва ўстаноўленыя тэрміны.

Навіны Беларусі (БЕЛТА)