Прамысловыя прадпрыемствы Беларусі будуць развіваць супрацоўніцтва з "Газпрамам"

Прамысловыя прадпрыемствы Беларусі будуць развіваць супрацоўніцтва з "Газпрамам". Гэта прадугледжана дакументамі па развіцці ўзаемавыгаднага супрацоўніцтва, падпісанымі ў рамках Пецярбургскага міжнароднага газавага форуму, паведамілі БЕЛТА ў расійскай кампаніі.

Рэалізацыя мерапрыемстваў, прадугледжаных дакументамі, будзе садзейнічаць далейшаму ўмацаванню сувязей Беларусі і Расіі ў прамысловай і паліўна-энергетычнай сферах.

Так, намеснік прэм'ер-міністра Беларусі Віктар Каранкевіч і старшыня праўлення ПАТ "Газпрам" Аляксей Мілер падпісалі мемарандум аб супрацоўніцтве. Дакумент накіраваны на распрацоўку і асваенне выпуску высокатэхналагічнай, уключаючы імпартазамяшчальную прадукцыю беларускіх вытворцаў для патрэб расійскай кампаніі.

Акрамя таго, міністр энергетыкі Беларусі Аляксей Кушнарэнка, губернатар Ленінградскай вобласці Аляксандр Драздзенка і Аляксей Мілер падпісалі мемарандум аб узаемаразуменні. Бакі прапрацуюць пытанні вытворчасці, пастаўкі і абслугоўвання абсталявання беларускіх прадпрыемстваў для рэалізацыі праектаў газіфікацыі на тэрыторыі Ленінградскай вобласці.

ААТ "МАЗ" - кіруючая кампанія холдына "БЕЛАЎТАМАЗ" і ТАА "Газпрам гелій сэрвіс" падпісалі пагадненне аб намерах. Кампаніі вывучаць перспектывы сумеснай работы пры пастаўках звадкаванага прыроднага газу (ЗПГ) для патрэб аўтамабільнага завода. Цяпер расійская кампанія разглядае магчымасць будаўніцтва комплексу па вытворчасці ЗПГ на тэрыторыі Кітайска-беларускага індустрыяльнага парка "Вялікі камень". У сваю чаргу МАЗ плануе пашырыць серыйную вытворчасць грузавой тэхнікі на звадкаваным прыродным газе.

Заключаны і іншыя пагадненні з расійскімі кампаніямі. Так, БЕЛАЗ і АТ "Крыягенмаш" будуць сумесна распрацоўваць кар'ерныя самазвалы і заправачныя сістэмы на звадкаваным прыродным газе і вадародзе. Бакі падпісалі пагадненне аб супрацоўніцтве ў галіне аснашчэння кар'ернай тэхнікі газавымі сістэмамі сілкавання. Яны плануюць заняцца распрацоўкай крыягеннай бартавой паліўнай сістэмы (КБПС) для прымянення ў канструкцыі колавых транспартных сродкаў вытворчасці ААТ "БЕЛАЗ", укамплектаваных газавымі рухавікамі і сістэмай захоўвання на борце звадкаванага прыроднага газу, наладжваннем вытворчасці КБПС на прадпрыемствах Саюзнай дзяржавы. У перспектыве БЕЛАЗ і "Крыягенмаш" плануюць ацаніць магчымасць прамысловай вытворчасці самазвалаў з вадароднымі паліўнымі ячэйкамі.

БелТА