Стратэгія развіцця тарфяной прамысловасці на 2021-2025 гады распрацоўваецца ў Беларусі

Стратэгія развіцця тарфяной прамысловасці на 2021-2025 гады распрацоўваецца ў Беларусі. Аб гэтым паведаміў міністр энергетыкі Віктар Каранкевіч у час наведвання ААТ "Торфабрыкетны завод Дзітва", паведамілі БЕЛТА ў прэс-службе Мінэнерга.

"Дакумент у высокай ступені гатоўнасці. Перад прадпрыемствамі галіны стаяць важныя задачы - па павелічэнні аб'ёмаў рэалізацыі прадукцыі, павелічэнні выручкі, паляпшэнні якасных паказчыкаў, а гэта рост прадукцыйнасці працы і заработнай платы", - адзначыў Віктар Каранкевіч.

Тарфяная прамысловасць адыгрывае важную ролю ў энергетычнай бяспецы краіны, дадаў ён. У агульнай долі выкарыстання мясцовых відаў паліва торф займае каля 15 працэнтаў. "Ёсць усе ўмовы для павелічэння гэтай колькасці", - упэўнены міністр.

У адпаведнасці з даручэннямі кіраўніка дзяржавы сістэмна мадэрнізуюцца асноўныя вытворчыя фонды торфапрадпрыемстваў з выкарыстаннем сучаснага абсталявання і тэхналогій, укараняюцца новыя метады распрацоўкі тарфяных палёў. "Дзітва - не выключэнне. Гэта ўзор работы торфапрадпрыемства - сучасная вытворчасць, адна з лепшых", - канстатаваў кіраўнік ведамства.

Штогод у Беларусі здабываецца каля 2 млн т торфу. Па яго здабычы краіна займае чацвёртае месца ў свеце, а па вытворчасці торфабрыкетаў - першае. У тарфяной прамысловасці працуюць каля 3 тыс. чалавек.

Віктар Каранкевіч азнаёміўся з гаспадарча-эканамічнай дзейнасцю прадпрыемства, правёў сустрэчу з працоўным калектывам. Пытанні, што паступілі ад работнікаў завода, датычыліся перспектыў тарфяной прамысловасці з улікам запуску БелАЭС, магчымасці павелічэння паставак тарфяной сушонкі на ААТ "Краснасельскбудматэрыялы", умоў падключэння электракатлоў для патрэб ацяплення і гарачага водазабеспячэння і іншых тэм. На ўсе пытанні міністр даў растлумачэнні.