У гэтым годзе ў Беларусі адрамантуюць не менш за 3 тыс. кіламетраў дарог

У гэтым годзе ў Беларусі адрамантуюць не менш за 3 тыс. км дарог. Аб гэтым у праекце БЕЛТА "Краіна гаворыць" расказаў начальнік галоўнага ўпраўлення аўтамабільных дарог Міністэрства транспарту і камунікацый Рыгор Глазко.

Гаворачы аб фінансаванні на аб'екты будаўніцтва, рэканструкцыі, капітальнага і бягучага рамонту, Рыгор Глазко адзначыў, што ў пачатку 2023 года планавалася накіраваць каля Br800 млн. "Гэта давала нам магчымасць адрамантаваць 1,5 тыс. км аўтамабільных дарог і 3,5 тыс. маставых збудаванняў. Аднак у пачатку года кіраўнік дзяржавы зрабіў шэраг заўваг у частцы дарог агульнага карыстання і даручыў прывесці гэтыя дарогі ў належны транспартна-эксплуатацыйны стан. Урад даволі аператыўна знайшоў дадатковыя сродкі, і ў выніку цяпер сума на гэтыя мэты складае каля Br1,4 млрд. За гэтыя сродкі па выніках года плануецца адрамантаваць не менш як 3 тыс. км аўтамабільных дарог і 4,5 тыс. пагонных метраў маставых збудаванняў", - расказаў ён.

Няма ніякіх сумненняў у тым, што ўсе сродкі будуць асвоены і ўсе работы будуць выкананы, упэўнены начальнік упраўлення. "Частка гэтых грошай ідзе на рэспубліканскую дарожную гаспадарку, а частка на мясцовыя дарогі. На рэспубліканскія дарогі з гэтай сумы пойдзе каля Br800 млн (не менш як 1,3 тыс. км дарог), а на мясцовую сетку каля Br430 млн (не менш як 1,7 тыс. км дарог).

БелТА