02.10.2025

Моладзь за бяспеку: крок насустрач бяспечнай будучыні

З 6 па 17 кастрычніка ў Глыбокім пройдзе iнфармацыйна-прапагандысцкая акцыя "Моладзь за бяспеку", закліканая прыцягнуць увагу падрастаючага пакалення да дзейнасці Беларускай маладзёжнай грамадскай арганізацыі ратавальнікаў-пажарных (БМГАРП). Ініцыятарам акцыі выступае Міністэрства па надзвычайных сітуацыях Рэспублікі Беларусь.

Як адзначылі ў Глыбоцкім РАНС, акцыя накіравана на фарміраванне культуры бяспекі жыццядзейнасці сярод моладзі.

У рамках кампаніі прадстаўнікі МНС сумесна з юнымі ратавальнікамі правядуць марафон добрых спраў пад сімвалічнымі назвамі "112 добрых спраў" і "101 дабро". Паводле інфармацыі Глыбоцкага РАНС, юныя добраахвотнікі акажуць пасільную дапамогу пажылым людзям, уключаючы ўборку прысядзібных участкаў, збор ураджаю і нарыхтоўку дроў.

Асаблівая ўвага будзе нададзена забеспячэнню пажарнай бяспекі ў дамах пажылых грамадзян. Юныя ратавальнікі навядуць парадак у жыллi і ўсталююць аўтаномныя пажарныя апавяшчальнікі, што, на думку спецыялістаў, значна павысіць бяспеку людзей "залатога" ўзросту.

Супрацоўнікі МНС таксама засяродзяцца на рабоце з падрастаючым пакаленнем. У адукацыйных установах пройдуць мерапрыемствы, накіраваныя на папулярызацыю руху юных ратавальнікаў-пажарных, фарміраванне культуры бяспечных паводзін і прыцягненне новых членаў у БМГАРП.

Удзельнікаў акцыі чакаюць тэматычныя конкурсы, віктарыны і латарэі з падарункамі і сюрпрызамі ад работнікаў МНС. Як паведамляюць арганізатары, шэрагі Беларускай маладзёжнай грамадскай арганізацыі ратавальнікаў-пажарных абавязкова папоўняцца новымі актыўнымі ўдзельнікамі.

Глыбоцкі РАНС заклікае ўсіх неабыякавых далучыцца да акцыі "Моладзь за бяспеку" і ўнесці свой уклад у агульную справу забеспячэння бяспекі жыццядзейнасці.