16.12.2024

Адбылося адкрыццё помніка ў в. Забор'е

У вёсцы Забор'е Глыбоцкага раёна адбылося адкрыццё помніка, усталяванага на месцы пахавання 15 савецкіх воінаў, якія загінулі ў гады Вялікай Айчыннай вайны.

У цырымоніі адкрыцця прынялі ўдзел старшыня Глыбоцкага раённага Савета дэпутатаў Вера Цяліца, намеснік старшыні райвыканкама Таццяна Тарасевіч, пракурор Глыбоцкага раёна Валерый Дайлідзёнак, члены працоўных калектываў, грамадскіх аб'яднанняў, навучэнцы Азярэцкай сярэдняй школы.

Перад удзельнікамі мерапрыемства выступіў старшы навуковы супрацоўнік Глыбоцкага музея Аляксандр Хайноўскі, які распавёў пра падзеі, якія адбываліся на гэтым месцы ў гады вайны.

Была ўсталявана таблічка з QR-кодам у рамках міжнароднага інтэрактыўнага гісторыка-патрыятычнага праекта "Лічбавая зорка".

Удзельнікі мітынгу ўсклалі кветкі і ўшанавалі памяць герояў, якія загінулі ў гады Вялікай Айчыннай вайны, хвілінай маўчання.