19.11.2024

Як Глыбоцкі жытні хлеб заваёўвае гандлёвыя сеткі Краснадара

Глыбоцкі хлебазавод са сваёй прадукцыяй выйшаў на расiйскі рынак. Прачытаўшы гэта, вы падумаеце, што гэта жарт, бо, як вядома, у суседняй краіне заўсёды збіраюць рэкордныя па аб'ёме ўраджаі пшаніцы, і ўжо чаго-чаго, а хлеба там хапае. Але вось у тым і справа, што хлеб у Расіі - пшанічны, а глыбачане прапануюць наш традыцыйны - жытні.

14 тон жытняга хлеба з печаў Глыбоцкага хлебазавода ўжо адпраўленыя ў Расійскую Федэрацыю. Па словах дырэктара хлебазавода Валерыя Гіро, прадукцыя пастаўляецца ў гандлёвую сетку горада Краснадар праз Маскву.

– Для захавання свежасці хлеб папярэдне замарожваем. Для гэтага маем неабходнае тэхналагічнае абсталяванне. Закупілі і ўсталявалі халадзільныя камеры, падвялі да іх неабходныя камунікацыі. На гэтыя мэты затрацілі больш за 500 тысяч рублёў, - кажа Валерый Аляксандравіч. - У лістападзе плануем экспартаваць не менш як 36 тон замарожанага хлеба. Адзначу, што расiйскі рынак ёмісты і нашы гандлёвыя партнёры кажуць, што гатовы браць у нас штомесяц па 200 тон жытняга хлеба. Нажаль, вытворчыя магчымасці нашага прадпрыемствы абмежаваныя, і мы не можам поўнасцю задаволіць гэты запыт.

У Расію пастаўляецца жытні хлеб пад брэндамі "Белае жыта", "Восеньскі" і "Вёсачка мая". Кожная булка хлеба важыць усяго 300 грам. Хлеб круглы, у выглядзе аладкі. Працэс яго замаразкі адносна не складаны і эфектыўна забяспечвае захаванне ўсіх смакавых і пажыўных якасцяў прадукта.

– Мы стараемся падтрымліваць высокія стандарты якасці на ўсіх этапах вытворчасці, у тым ліку і працэс замарожвання, каб кожны пакупнік мог атрымаць асалоду ад свежага і духмянага жытняга хлеба пад нашымі знакавымі брэндамі, – кажа Валерый Гіро.

Працэс замарожвання-размарожвання хлеба - важны крок у захаванні яго свежасці і якасці. Пасля выпечкі хлеб астуджаецца да пакаёвай тэмпературы, затым падвяргаецца замарозцы ў спецыяльных халадзільных камерах пры аптымальнай тэмпературы.

– У замарожаным выглядзе яго лёгка транспартаваць на далёкія адлегласці. Адзначу, што працэс замарожвання дазваляе запаволіць працэсы акіслення, захоўваючы смак, тэкстуру і пажыўныя рэчывы хлеба, - кажа майстар змены хлебабулачнага цэха Дар'я Салодкая. - Для размарожвання хлеба яго вымаюць з маразільных камер і размарожваюць пры пакаёвай тэмпературы, што дапамагае захаваць якасць і свежасць прадукта. Размарожванне часта адбываецца павольна, каб пазбегнуць змен у структуры хлеба, якія могуць прывесці да страты яго смакавых якасцяў. Пасля размарожвання хлеб гатовы да выкарыстання і захоўвае свой першапачатковы смак і водар. Увесь працэс замарожвання-размарожвання кантралюецца і выконваецца з захаваннем усіх неабходных стандартаў і патрабаванняў якасці.

Па словах Валерыя Гіро, рэалізоўваць экспартныя віды хлябоў на ўнутраным рынку пакуль не плануецца, што звязана з неабходнасцю рэгістрацыі новых рэцэптур на тэрыторыі нашай краіны.

– Для расiян мы выпякаем хлеба па рэцэптах ужо зарэгістраваных у Расійскай Федэрацыі, таму праблем з рэалізацыяй прадукцыі там у нас няма, - адзначае Валерый Аляксандравіч.

Мы шчыра рады за глыбоцкіх хлебапякароў, бо выхад на расійскі рынак адкрывае для прадпрыемства цэлы шэраг перспектыў і магчымасцей: пашыраецца рынак збыту прадукцыі, расце канкурэнтаздольнасць, з'яўляецца магчымасць абмену ведамі і досведам. У цэлым прасоўванне глыбоцкага хлеба на расiйскi рынак будзе садзейнічаць умацаванню пазіцый хлебазавода, павышэнню яго прыбытковасці, а таксама з'яўленню новых відаў і смакаў хлеба.