26.02.2025

На глыбоцкай сцэне выступілі лепшыя вакалісты рэгіёна

Занальны адборачны тур XXXІ абласнога конкурсу патрыятычнай песні "Песні юнацтва нашых бацькоў" прайшоў 26 лютага ў Глыбокім.

За перамогу ў творчым спаборніцтве змагаліся больш за дваццаць таленавітых маладых выканаўцаў (пераможцы раённых тураў) з Глыбоцкага, Браслаўскага, Верхнядзвінскага, Докшыцкага, Міёрскага, Пастаўскага, Ушацкага, Шаркаўшчынскага, Полацкага раёнаў і горада Наваполацка. Глыбоччыну на конкурсе прадставілі настаўнік па класе акардэона Глыбоцкай дзіцячай школы мастацтваў Эла Драгун і кіраўнік студыі "Архіў" Гарадскога Дома культуры Ірына Скрага.

Канкурсанты, па традыцыі, выканалі па дзве песні - грамадзянска-патрыятычнай тэматыкі і беларускі хіт. А гэта значыць, што гледачы ўбачылі больш за сорак яркіх, запамінальных канцэртных нумароў.

Членам журы прыйдзецца вельмі нялёгка, бо з двух дзясяткаў добрых вакалістаў ім трэба будзе абраць самых-самых.

Вынікі адборачнага тура стануць вядомыя праз некалькі дзён.