19.05.2025

"Ноч музеяў" у Глыбоцкім гісторыка-этнаграфічным музеі

Міжнародны дзень музеяў быў усталяваны ЮНЕСКА ў 1977 годзе і прымяркоўваецца да дня, калі можна бясплатна наведаць большасць музеяў свету, што дазваляе ўбачыць унікальныя калекцыі і спадчыну розных народаў. Але асабліва папулярным фарматам з'яўляецца правядзенне асаблівых акцый менавіта ноччу -традыцыя зарадзілася ў Берліне ў 1997 годзе і атрымала распаўсюджванне ў мностве краін свету.

Глыбоцкі музей актыўна падтрымлівае міжнародныя тэндэнцыі і штогод адкрывае свае дзверы ўвечары, падаючы наведвальнікам унікальную магчымасць правесці вечар у атмасферы мастацтва і творчасці. Сёлета ўстанова адзначыла свой удзел у акцыі ўжо 13-ы раз.

- Галоўная мэта такіх мерапрыемстваў - прыцягнуць увагу грамадскасці да культурнай спадчыны краіны і рэгіёна, зацікавіць маладых людзей наведваннем музеяў. Акцыя "Ноч музеяў" прадугледжвае шырокі спектр забаў: пачынаючы ад інтэрактыўных экскурсій і заканчваючы мастацкімі выставамі, канцэртамі, паказамі фільмаў і нават кулінарнымі эксперыментамі, - кажа дырэктар Глыбоцкага гісторыка-этнаграфічнага музея Алена Мядзелец. - Адным з галоўных элементаў цяперашняй ночы ў нас сталі незвычайныя прадстаўленнi і гульнявыя формы ўзаемадзеяння з аўдыторыяй.

У прыватнасці, работнікі музея зладзілі вясёлы флэшмоб, разыграўшы тэлешоу з элементамі віктарын і конкурсаў. Гледачы таксама сталі ўдзельнікамі ўсімі любімай перадачы "Поле цудаў", згуляўшы ў жартоўную версію папулярнай гульні.

Асаблівасць гэтага года заключалася ў крэатыўным падыходзе арганізатараў: музей прапанаваў гледачу цэлы комплекс мерапрыемстваў, уключаючы стварэнне лістоў XIX стагоддзя, правядзенне спірытычнага сеансу з варожбамі, дэгустацыю рэдкіх гатункаў травяной гарбаты і творчы конкурс малюнкаў. Усе гэтыя актыўнасці дазволілі гасцям пранікнуцца атмасферай эпохі і адчуць непаўторную сувязь часоў.

Акцыя завяршылася займальным квэстам "Застацца ў жывых", падчас якога ўдзельнікі змагаліся за званне знаўцаў гісторыі роднага краю. У працэсе конкурсу каманды вырашалі галаваломкі і дэманстравалі веды, якія тычацца архітэктуры, побыту і выбітных асоб Глыбоцкага раёна.

Падводзячы вынікі, хочацца адзначыць асаблівую значнасць падобных мерапрыемстваў для захавання памяці аб мінулым і ўмацавання цікавасці грамадства да захавання нацыянальнага здабытку. Дзякуючы гэтаму мерапрыемству, жыхары і госці Глыбокага змаглі пераканацца, што музей здольны прапанаваць значна больш, чым звыклы агляд экспазіцый.