Форум маладых спецыялістаў – выдатны спосаб завесці новыя знаёмствы, пагутарыць паміж сабой для моладзі, занятай у самых розных сферах дзейнасці, а самае галоўнае - яны маюць магчымасць напрамую пагутарыць з кіраўніцтвам раёна і задаць ім цікавыя пытанні.

Па добрай традыцыі на Глыбоччыне прайшоў злёт маладых спецыялістаў, які сабраў актыўную і мэтанакіраваную моладзь раёна.

Усяго ў Глыбоцкім раёне прыступілі да працы 144 прадстаўнікі розных сфер дзейнасці, нядаўніх выпускнікоў вышэйшых і сярэдніх спецыяльных навучальных устаноў.

Ключавым момантам злёту стаў адкрыты дыялог маладых спецыялістаў з кіраўніцтвам раёна, які адбыўся ў гарадскім доме культуры.

Абмеркаваць хвалюючыя пытанні з моладдзю прыйшлі старшыня Глыбоцкага раённага Савета дэпутатаў Вера Цяліца, намеснікі старшыні райвыканкама Таццяна Тарасевіч і Алена Шаланько.

Удзел у мерапрыемстве прынялі і прадстаўнікі раённых служб, хто па абавязку службы першымі аказваюць неабходную падтрымку маладым спецыялістам на працоўных месцах.

Звяртаючыся з прывітальным словам да маладых спецыялістаў, старшыня Глыбоцкага раённага Савета дэпутатаў Вера Цяліца падкрэсліла, што наш рэгіён дынамічна развіваецца. У раёне створаны ўмовы для паспяховай працы, маецца неабходная для жыцця інфраструктура: школы і дзіцячыя сады, медыцынскія ўстановы, аб'екты культуры і спорту і інш.

– Глыбоччына – гэта край з багатай гісторыяй, вядомы сваімі гісторыка-культурнымі каштоўнасцямі і знакамітымі ўраджэнцамі, - адзначыла Вера Міхайлаўна. - Я спадзяюся, што вы застанецеся тут пасля абавязковай адпрацоўкі, сваёй працай, ведамі і стараннасцю будзеце ўмацоўваць наш раён. Жадаю вам поспехаў у працоўнай дзейнасці на карысць нашага рэгіёна і ўсёй краіны.

Вера Міхайлаўна запэўніла, што маладым спецыялістам будзе аказана ўсебаковая падтрымка, каб яны замацаваліся на сваіх першых працоўных месцах і каб іх прафесійнае станаўленне праходзіла ў камфортных умовах.

Сустрэча маладых спецыялістаў з кіраўніцтвам раёна прайшла на хвалі пазітыву і стала выдатнай пляцоўкай для прадуктыўных зносін.

У гэтым годзе арганізатары прадугледзелі разнастайную і насычаную праграму.

 

Завяршальным акордам мерапрыемства быў маладзёжны музычны квіз "Музычная хваля".